ANG labing dakong mensahi pagbitay nila ni Ramon Credo, 42; Sally Ordinario-Villanueva, 32; ug Elizabeth Batain, 38, didto sa China niadtong Marso 30 tungod sa pagpayuhot og drugas mao ang pagpasantop unsa kabililhon ang kinabuhi sa tawo.

Gipaningkamotan sa gobiyerno nga mahiklin ang pagbitay. Liboan nga mga tawo nagpagawas og mensahi naghangyo sa gobiyerno sa China dili nalang unta ihinayon ang pagpatay sa tulo.

Bisan sa daghang mga pakiluoy nahinayon ang ilang pagbitay. Wa malukmay ang China.

Taliwa niining makabungog nga pagtutol sa pagbitay nagpadayon kining pagpang-ihaw sa mga tawo sa bisan asang suok sa Pilipinas.

Tinuod, gihiklin na sa gobiyerno ang "silot kamatayon" apan dili malalis ang pagsaka sa kriminalidad sa atong nasod. Kriminalidad nga nagbuhis og liboan nga mga kinabuhi sa tawo.

Unsa may himuon karon niining mga tawo o grupo, bisan ang gobiyerno, nga ningbarog ninghangyo paghiklin sa pagbitay nila ni Credo, Ordinario ug Batain.

Seryoso ba gyud sila sa ilang krusada pagbatok sa "execution" sa tawo. O tungod lang kay nabaniog sa tibuok kalibutan ang pagbitay sa tulo ka mga Pilipino didto

sa China hinungdan nga nanggawas sila ug nakigbisog nga mapugngan ang bitay.

Kon seryoso ta sa pagpreserbar sa kinabuhi sa tawo, dili nato limitahan ang pakigbisog ug krusada batok sa "death sentence." Mismo sa atong tugkaran nagpanghitabo ang pagpangpatay. Naalarma ba niini ang gobiyerno? Duna bay konkretong program ang gobiyerno aron kaminusan na kining kreminalidad sa nasod?

Unsa may dungog nato pagpangugat nga hunongon ang pagbitay sa China kon mismo sa atong palibot nangbanaw ang dugo sa mga patay matag adlaw gumikan sa nagkadaiyang hinungdan sama sa aksidenti pagpanulis, pangabuso, ug uban pang kreminalidad.

Lisod ikampaniya ang pagpreserbar sa kinabuhi sa tawo. Lisod ikampaniya ang pagpabuhi sa tawo kay mismo ang mga tawo nga mibatok anang silot kamatayon wa man gani magtagad pagpatunhay sa ilang kinabuhi.

Unsaon pagkahimong epektibo sa imong mensahi nga batokan kanang silot kamatayon, nga ipreserbar ang kinabuhi sa tawo, kon ikaw mismo hinay-hinay nga gipatay imong lawas pinaagi sa pag-inom, sigarilyo, pagkaon og mga makaon nga makadaot sa panglawas.

Bililhon uyamot ang kinabuhi sa tawo apan mabatyagan lamang kana kon anaa na sa iyang katapusang mga gutlo.