GUSTONG hunoson na lamang sa usa ka bana ang iyang kaugalingon pinaagi sa pagtigbas sa iyang ulo human nakalalis ang asawa niini niadtong Domingo mga alas 5:00 sa hapon sa Macabalan ning siyudad sa Cagayan de Oro.

Giila ang biktima nga mao si None Sagado, 24, minyo, sa susamang dapit.

Nasayran nga nakainom ang biktima ug dihang miuli sa puloy-anan nagkalalis kini sa iyang asawa hinungdan nga sa kalagot, giunay pagtigbas ang iyang ulo gamit ang sundang.

Giingong dili gusto niining pasakitan ang asawa hinungdan nga giunay niini pagtigbas iyang ulo. Samaran nga gidala sa asawa niini si Sagado sa Northern Mindanao Medical Center (NMMC).

Daghan ang nagtuo gusto na lamang hunoson niini ang kaugalingon tungod sa panaglalis.

Sa laing hitabo, usa ka lalaki ang naunay sa iyang kalibre .38 nga pistola ug napusilan ang kaugalingon didto sa lungsod sa Medina, Misamis Oriental.

Giila ang biktima nga mao si Renerio I. Maquidato, 40, minyo, sa susamang dapit.

Nasayran nga mibisita kini sa puloy-anan sa ginikanan niini dihang ug gidala-dala ang armas.

Kalit lang nahulog ang pistola hinungdan mibuto ug naigo ang likod nga bahin sa biktima.

Gidala sa NMMC ning siyudad si Maguidato ug kasamtangan nga ubos sa oberbasyon sa mga doktor. (SVB)