SUPORTADO sa bag-ong City Police Director sa Cagayan de Oro City ang hangyo sa pipila ka mga barangay kapitan nga ibalik na ang Police Assignment Assistance System (Paas) sa mga barangay ning siyudad.

Ang Paas usa ka programa sa Cagayan de Oro City Police Office (Cocpo) nga butangan og mga polis ang nagkadaiyang barangay aron maghatag og seguridad saPalibot, apan niadtong liderato pa ni Police Senior Superintendent Benidecto Lopez, gitangtang kini hinungdan ning bag-o lang mihangyo pag-usab ang mga pipila ka mga barangay opisyal nga ibalik ang Paas.

Si Association of Barangay Council (ABC) president Dometilo Acenas nibutyag sa interbyu sa RMN-dxCC nga dako iyang panglantaw nga ibalik ang maong sistema tungod kay dako kini nga tabang sa mga barangay.

Kini dako gyod og tabang alang niadtong mga barangay nga layo kayo sa police station ug labina gyod sa mga hinterlands.

Samtang pipila ka mga kapitan niingon nga ilang nasabtan ang kakulangon sa mga tawo sa kapolisan ug nasabtan nga angayan pa gyod kini hisgotan sa Cocpo.

Si Kapitan Alexander dela Cerna nga nahinabi sa Sun.Star SuperBalita niingon nga mas mobati ang katawhan nga protektado sila kung anaa ang mga polis nakabantaya labaw na kung anaa sa mga barangay.

Hinuon suportado ni City Director Police Superintendent Gerardo Rosales ang maong hangyo sa mga kapitan labina nga gilantaw man ang kahapsay ug kalinaw sa dakbayan apan sa kasamtangan ila pang gisabutan ug giplano ang pagpatuman niini.

Daghan usab sa mga plano ang gilantaw ni Rosales alang sa siyudad ug apil na niini ang 24 oras nga police visibility sa kadalanan.