USA ka gasoline station ang gitulis sa duha ka mga lalaki ug midis-arma sa sekyu mga alas 3:00 sa kaadlawon kagahapon sa Zone 2, Lower Bulua ning siyudad sa Cagayan de Oro.
Sa inisyal nga imbestigasiyon sa kapolisan sa Police Station 7 (PS7) sa Bulua nasayran nga unang nagpatuo nga mga kustomer ang mga suspetsado ug gidis-armahan ang sekyu sa Petron Gasoline Station nga nahimutang sa nahisgutang dapit.
Ang usa sa mga suspetsado nagsul-ob og itom nga jacket nga nakamaskara ug armado sa gituhang kalibre .45 nga armas samtang ang laing usa naka-elmet ug nagdala og icepick diin pulos gibana-banang nagpangidaron og 30 ngadto sa 35 anyos.
Sa pakighinabi sa Sun.Star Superbalita ngadto kang Police Senior Inspector Danilo Calurasan, Deputy Station Commander sa Police Station 7 (PS7) sa Bulua gibutyag niini nga daling mipalayo sa maong dapit ang mga suspetsado sakay sa motorsiklo nga XRM 125 kolor itom ug puti sa wala matino nga direksiyon hinungdan usab nga wala na nila kini masapon sa dihang nagpahigayon og hot pursuit operation.
Gibutyag ni Glen, kahera sa maong patigayon nga sa dihang nakita na niini nga gidis-armahan na sa mga suspetsado ang ilang guwardiya nitago na lamang siya uban sa attendant ug midagan palayo sa maong cashier booth mao usab nga nakahigayon sa paglimas ang maong mga suspetsado.
Nadala sa maong mga suspetsado ang salaping cash nga mokabat ngadto sa P10 mil ug usa ka shotgun rifle nga kargado og tulo ka mga buhing bala.
Matud ni SPO2 Joel Baldado nga ila pang palawman ang imbestigasiyon ug nagpahigayon usab sila og follow-up operation.
Susihon usab ang nakabutang nga Closed-circuit Televison Camera (CCTV) sa maong patigayon bisan pa man nga nakatabon ang mga panagway niini kay ugaling aduna kini makuha nga dugang pa nga mga ebedinsya.
Sa pagsulat niini nga balita padayon pa nga nagpahigayon og dugang imbestigasiyon ang kapolisan sa PS7 aron usab masumpo na ang sunod-sunod nga tulis dinhi ning siyudad.