NAANGKON sa Salazar College of Science Institute and Technology (SCSIT) Skyblazers ang solong liderato human nila gipangpukan ang kanhi wala’y pilde nga Ave Maria Sanctuary Park, 93-89, sa miaging gabii sa Cebu Basketball Association sa Cebu Coliseum.
Ang Skyblazers ni coach Jojo Romarate nag-inusara na karon sa ibabaw dala ang 4-0 nga rekord samtang ang Ave Maria ni coach Edito Salacut natagak sa 3-1 nga baraha.
Unang miratsada ang Skyblazers ug nakamugna kini’g 26-18 nga labaw apan sa 2nd quarter, ang Ave Maria na sab ang nanginit ug nakaposte kini’g 49-45 nga labaw sa halftime.
Nagkumboya sila si Rino Berame ug Mark Abadia sa pagmugna og unom ka wala’y tubag nga mga puntos aron hatagan ang Skyblazers og 87-81 nga labaw sa nahabiling 2:27 minutos.
Apan ninggukod na sab ang Ave Maria hangtod nga natabla nila pagbalik ang duwa, 89-89, sa nahabiling 30 segundos pinaagi sa three-point shot ni Alex Cainglet. Nakapuntos na sab si Abadia aron ibalik ang labaw ngadto sa Skyblazers, 91-89, sa nahabiling walo ka segundos.
Sa return play, usa ka dakong turnover ang namugna sa Ave Maria nga maoy nakatigbak sa ilang poruhan.
Ang duha ka freethrows ni Berame sa nahabiling duha ka segundos maoy milansang sa kadaugan. Si ex-PBA Jerkules Tangkay maoy nangulo sa Ave Maria pinaagi sa iyang 18 puntos samtang midugang og 15 puntos si Kurt Amores.
SCSIT (93)- Berame 28, Abadia 24, Padilla 16, Torion 9, Huebes 4, Garcia 3, Daculan 2, Isidro 2, Labares 2 Ave Maria (89)- Tangkay 18, Amores 15, Dacia 11, Duran 10, Llanto 10, Cainglet 6, Gabas 4, France 4, Ocanada 2, Delfino 1.