MAAYONG balita alang sa mga opisyal ug lumolupyo sa Syudad sa Sugbo. Modawat ang Syudad sa Naga sa dakong bahin sa basura nga karon naa gilabay sa Inayawan nga ipasirado na gyud.

Atong nasayran sa katuigan nga nanubra na gyud sa kapasidad ang Inayawan dumpsite nga layo ra kaayo sa pagka sanitary. Nagbundo na ang mga basura niini. Ug ang baho, ambot lang. Kadtong naguba ang air-con sa among kagang-kagang nga sakyanan ug kinahanglang ablihan ang bintana niiini, mahanggap gyud nako ang kabaho inig agi sa SRP. Gani, dunay higayon nga magsugod na ko paghanggap sa baho nga mopilit sa ilong ug sa panit sa wa pa moagi sa Kawit inig padulong sa Syudad sa Talisay.

Kay wa man say barangay sulod sa Syudad sa Sugbo nga mosugot nga tukoran og alternatibong dumpsite, wa gyud mapasirad-i ang dumpsite sa Inayawan hangtod nga karon, di na gyud mahimo nga padayon pa kini.

Ug magpasalamat kita nga modawat ang Syudad sa Naga sa basura sa Syudad sa Sugbo.

Nagkanayon si Mayor Valdemar Chiong Syudad sa Naga nga nihangyo kaniya si Mayor Mike Rama sa Syudad sa Sugbo nga adto ipadala ang basura nga unta dad-on sa Inayawan sa material recovery facility (MRF) sa Naga.

Tinuod, dunay dako nga MRF ang Syudad sa Naga nga tipik sa solid waste management niini.

Taym sa diay. Unsa man kining MRF? Atong nasayran nga usa kini ka pasilidad diin awtomatik na ang pagbahinbahin sa basura ngadto sa di malata ug malata.

Ang mga ma-recycle, ibaligya ngadto sa mga mopalit og mga scrap ug recycled materials sama sa mga botelya ug plastic. Ang mga di-ma-recycle himuong solid fuel nga ibaligya sab ngadto sa mga kompanya nga naa sa Naga o himuon bang tinubdan sa methane nga mahimong mabaligya sab.

Ang sobra, himuong compost nga mabaligya usab isip patambok sa yuta.

Buot ipasabot, way usik ang basura nga maabot sa Naga ug mahimo pang makwarta. Kining maong pasilidad sa Naga gidumala sa pribadong kompanya apan sa akong nasabtan dihang niadto mi sa inagurasyon sa miaging tuig dunay bahin ang kagamhanan sa ginansya niini.

Tuod man, niingon si Mayor Chiong nga modawat ang MRF sa Naga sa basura sa Syudad sa Sugbo apan di lang sa tanang mga barangay kay basin og di maapas sa kapasidad niini.

Bisan pa man, nakaingon ko nga sama sa naanghelan ang Syudad sa Sugbo niini kay duna nay dapit nga andam diay modawat sa atong basura.

Akong nasabtan gikan kang Mayor Chiong nga kining MRF tipik sa iyang pagtuman sa VAL 2020 kun Vision and Leadership 2020 nga gi-unveil sa mayor kadtong inagurasyon sa Naga pagka syudad pipila n aka tuig nga milabay.

Tungod sab sa mga environmental issues, naglatid sab ang mayor og daghang mga proyekto nga makaayo sa kinaiyahan sama sa iyang mga tree-planting program. Nagplano na sab kini taud-taod na kabahin sa pagsulay niining mga solar-powered lights nga ibutang sa plaza ug city hall. Gusto lagi kuno siya mosulay niining renewable energy.

Sa pagkakaron, nalipay lang gyud ko nga makatabang ang Syudad sa Naga sa suliran sa basura dinhi sa Syudad sa Sugbo.