BISAN unsa ka gamay sa imong balay, basta imo kining kaugalingon nga panimalay, tam-is gyud kaayo. Mao nay giingon sa eningles nga ‘home sweet home’.
Aduna kay privacy. Kana bang makapabuot ka kon unsa ang imong pagabuhaton nga walay magbuot ug magtan-aw kanimo. Lahi ra gyud nang magpuyo ka sa usa ka lugar labi pa kon anaa ka sa evacuation center. Okey lang kon wala na gyud kay kapuy-an sama anang mga biktima sa kalamidad. Apan kon igo lang kang gipapahawa sa gobiyerno kay dilikado ang inyong kahimtang unya wala hatagi og relocation site, dako baya kaayo nang purwesyo.
Mao kini karon ang kahimtang anang mga usa ka gatus ka pamilya nga gipapahawa sa ilang gipuy-an sa Inayawan Sanitary landfill gumikan sa kabalaka nga mahugno o matumpag ang nagtipun-og nga mga basura sa maong lugar. Gipapahawa dayon sila ni Mayor Mike Rama nga wala pa gani gi-andam nga relocation site alang kanila. Anaa sila karon gipapuyo sa Inayawan school ug sa gymnasium.
Nangreklamo
Nangreklamo na ang uban kay wala intawon silay maayong kinatulgan kay daghang tawo, mga bata nagdagan-dagan ug puwerting alimo-uta. Mao lagi nang akong gi-ingon sa unahan nga lisod magpuyo sa evacuation center.
Wala pay tarung rasyon sa pagkaon. Kon hunongon na sa kagamhanan sa dakbayan ang paghatag og rasyon sa pagkaon, asa man intawon kana sila mangita og pagkaon nga ang ilang panginabuhian atoa man didto sa basurahan? Maayo tong atoa pa sila didto sa ilang balay kay makaluto-luto pa sila.
Dili man na sila mosupak ba nga ibalhin kay una, dili na ilang yuta. Ikaduha, alang pod sa ilang siguridad. Kay mao lagi gumikan kay duol sila sa disgrasya. Inay sila maoy mangoykoy og basura, sila na hinuon ang koykoyon. Apan gi-andam unta tong daan ang relocation site sa wala pa sila papahawaa.
Matod pa ni Probe chief Raquel Arche nga ibalik ra sila inig abre sa klase kon dili makakita og relocation site ang city government. Tan-awa ra og gi-unsa nila pag hasol-hasol ang maong mga lumolupyo.
Bisan ingon ana ang ilang kahimtang pero aduna baya usab kana silay katungod nga nanginabuhi nga desente ug tinarong. Tarungon na sila og pabalhin bisan kon mamalik gihapon na sila didto sa basurahan kay atoa man didto ang ilang inadlaw nga panginabuhian kay lagi sila mga basurero lamang.
(bobby.nalzaro@yahoo.com)