NIULBO na usab ang kainit sa panagbikil tali ni Cebu City Mayor Mike Rama ug Congressman Tomas R. Osmeña.

Wa makauyon ang kongresista sa laraw ug sa mga gibuhat sa kasamtangang mayor ilabi na og maglambigit kini sa South Reclamation Project.

Sa niaging semana, nasuko si Osmeña sa dihang ang iyang tawo nga si Christian Hembra girelibohan isip SRP security manager ug gibalhin ngadto sa demolition team. Matod ni Osmeña nga namulitika si Rama ug gisakripisyo ang seguridad sa multi-billion nga investment sa dakbayan.

Apan kini gipanghimakak ni Romeo Cordova, ang gitudlong chief sa security sa city hall.

Gipasabot ni Cordova nga ila hinuong gipahugtan ang seguridad sa maong dapit pinaagi sa pagbutang og mga pulis ug security guards ug dili na kadtong mga 30 ka civilians ug mga miyembro sa Barangay Intelligence Network. Nisamot ang kasuko ni Osmeña sa dihang iyang nahibaw-an nga naglaraw si Rama nga mobaligya og luna sa SRP ngadto ni boxing superstar Manny Pacquiao.

Ang pagmugna og daghang trabaho alang sa mga Sugboanon maoy gusto gilayong sulbaron ni Rama. Apan gusto ni Osmeña nga di ipamaligya ang luna sa SRP kon dili gamiton kini sa dakbayan nga joint-venture sa mga dagkong negusyo nga matukod sa nahisgutang luna.

Sa ato pa, permanenting manag-iya ang dakbayan sa maong luna ug sa samang higayon makakuha usab og igong salapi nga makadugang sa pundo sa lokal nga pangagamhanan.

Ang panglantaw sa duha pulos kaayohan sa mga Sugboanon, kon imong tukion, apan

nagsubay sa managlahing dalan ug paagi.

Taliwala sa ilang susamang tinguha, hinaot pa unta nga way laing mas bug-at pang rason nga nagpahipi.