17 ka balay nangaugdaw

MOKABAT sa 17 ka mga balay ang nangaugdaw sa hingpit sa duha ka managlahing mga lugar nga nangaigo sa sunog dinhi sa dakbayan sa Sugbo kagahapon sa buntag ingon man sa hapon.

Unang naigo sa sunog mga alas 10:31 kagahapon sa buntag ang Sitio Eyha, Barangay Guadalupe, diin duha ka mga balay ang nangaugdaw sa hingpit ug tulo ang partially burned human giisa sa task force Alpha ang sunog.

Si SFO2 Vivencio Talle, fire investigator Cebu City Fire Department, nagkanayon nga ang sunog nagagikan sa balay ni Luzvimenda Labra, nga giukopahan sa kaliwat niining si Cecilia Delda, ingon man ang tulo ka andanang balay niini naugdaw.

Naugdaw usab ang 2nd floor sa balay ni Victor Empeso ug 2nd floor sa balay ni Lorain Echual.

Ang sunog nakontrolar sulod sa 25 minutos, diin naglisod ang mga bombero sa pagpawong sa kayo tungod sa ka gagmay sa dalan hinungdan nga gisumpay-sumpay na lang ang mga hose.

Matod pa ni Talle nga daghang anggulo karon ang ilang gisubay sa sunog, usa niini ang alegasyon nga dunay usa ka “Tata” nga adik nga gipalayas sa giabangan ug gitudlong responsabli sa sunog.

Giingong nahanaw lang og kalit si Tata dihang niulbo ang sunog.

Gawas niini gipangita usab nila ang helper sa pamilyang Labra human nawala usab atol sa sunog.

Dunay report nga nabiyaan niini ang giluto.

Hinuon karong adlawa mohimo pa silag dugang imbestigasyon sa insedenti.

Mokabat sa P200,000 kapin ang danyos sa sunog.

Samtang pagka-ala 1:44 sa hapon naugdaw usab sa hingpit ang 15 ka mga balay dihang naigo sa sunog ang Sitio Sto. Niño, Barangay Cogon Pardo.

Ang sunog nidanyos og P75,000 tungod kay ang mga balay ginama lang sa mga light material human gipaubos sa 2nd alarm ang sunog ug nakontrolar sulod sa 15 minutos.

Matud pa ni SFO2 Talle nga usa ka 6 anyos nga special child maoy gitudlong hinungdan sa sunog human giingong nagduwa-duwag posporo sa ilang balay.

Apan kining mga pasangil hugtanon kining gipanghimakak sa 12-anyos nga maguwang nga nagduwa-duwag kayo ang iyang manghod sanglit uban kini niya nga nanglaba niadtong higayuna.

Way swerte ang ilang tulo ka iro kay napaig dihang ni-ulbo ang sunog.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph