MISAKA sa 15 milyones pesos ang gipangayo nga ransom money sa mga kidnaper nga midagit kang Jinky Yap didto siyudad sa Cotabato.

Gibutyag ni Mayor Japal Guiani nga nagpadayon ang 'hot pursuit operation' sa otoridad aron gukdon ang mga suspek nga giingon nga miyembro sa Pintagon Kidnap for Ransom Gang.

Matud ni Cotabato City Police Director Senior Superintendent Danny Reyes nga ila nang nailhan ang tag-iya sa Hyundai Van nga dunay plaka XCM 456 nga gisakyan sa mga suspetsado.

Si 7th Marine Battalion Landing Team 7 commanding officer Colonel Jose Dorotheo Jalandoni nagbutyag nga selyado na nila ang gitaguan sa mga kidnaper sa utlanan sa dakbayan sa Cotabato ug Kabuntalan, Maguindanao.

Giingon nga subling mitawag ang grupo ni Kumander Toks Saguile ngadto sa pamilya sa biktima kinsa gibaharan nga kung mapakyas sila sa paghatag sa kantidad nga gipangayo ilang patyon si Yap.

Ila sab nga gibaharan ang otoridad nga ipahunong ang rescue operation aron dili mabutang sa peligro ang kinabuhi sa negusiyante.

Giklaro ni Mayor Guiani nga nagpabilin pa gihapon ang ilang 'no ransom policy' batok sa mga kidnaper nga mikidnap kang Yap. (Edgardo Fuerzas)