GISAAD karon sa Department of Public Works and Highways (DPWH) nga hapit na sugdan ang konstruksyon sa mga daot nga kalsada gikan siyudad sa Digos padung sa utlanan nga bahin sa Barangay Kinuskusan, Bansalan, Davao del Sur.

Ang maong gubaon nga kalsada nga maoy hinungdan sa aksidente sa kadalanan dugay rang gimulo sa mga motorista sa maong mga dapit.

Si DPWH District Engineer Isagani Javier nagbutyag sa Sun.Star Davao Superbalita kagahapon nga aprobado na ang badyet sa maong mga kalsada sa National Roads Improvement and Management Project (NRIMP) sa kauluhang Manila.

Gipasigarbo sa DPWH ang minilyong proyekto nga ilang gibubo sa lungsod sa Bansalan sama sa upat ka linyang kalsada, pag-ayo sa tulay ug ang dike sa Miral River isip proteksyon sa katawhan panahon sa baha.

Giklaro sa maong opisyal nga ilang ipadayon ang gitakda nga implementasyon sa 30 metros nga 4 lanes sa Davao-Cotabato national highway didto sa Bansalan bisan og daghang lumolupyo ang maapektuhan niini.

"For the meantime, itinigil muna natin pero kukunin talaga namin yan kasi sa gobyerno yan eh," ni Javier.

"Anyway, nasa korte nayan kaya korte ang mag decide," dugang ni Javier.

Gipasiatab sab nga hangtud sa sunod tuig magpadayon ang ilang pag-ayo sa tanang lubak nga kalsada sa Davao del Sur.

Giingon nga 10 milyones pesos nga pondo ang gigahin alang sa upat ka linyang dalan sa Bansalan, samtang P20 milyones sab ang 4 lanes sa Digos ug P30 milyones sa Sta. Cruz.

"Meron kaming budget for 2012 kasi mag widening na tayo lahat," pahayag ni Javier.

Gawas sa kalsada, sugdan sab ang paghimo og bag-ong tulay nga agianan sa mga sakyanan sa Bansalan nga gigahinan og pundo nga P14 milyones. (Orlando B. Dinoy)