PATAY ang 6 anyos nga bata human napisat dihang naatrasan sa bulldozer nga gi-operate sa kaugalingon nga amahan niadtong Lunes mga alas 1:00 sa hapon didto sa Barangay Santiago, siyudad sa Gingoog, Misamis Oriental.
Napisat ang lawas ni Jefferson B. Habla, lumad nga taga lungsod sa Tagoloan, Misamis Oriental.
Ang operator sa bulldozer mismo ang amahan niining si Dario Habla.
Nasayran nga nagbuldos ang amahan niini sa sapa nga bahin sa Barangay Santiago aron kuhaan og balas dihang wala nabantayan niini nga anaa sa likod ang iyang anak nga nag-uban niadtong tungora.
Nagsunod-sunod kini sa bulldozer hinungdan nga dihang miatras ang amahan naligid ang biktima ug nalatayan hinungdan sa pagkapisat sa lawas niini.
Ulahi na nga nabantayan sa amahan nga iyang anak ang iyang naagian ug wala siya nagdahom sa hitabo.
Ang traffic investigator sa Gingoog Police Station niingon nga wala nila nakita ang amahan human sa insidente hinungdan nga dako ilang pagduda nga misibat kini sa kahadlok nga mapriso.
Ang patayng lawas sa bata gidala pa sa duol nga balay tambalanan human sa hitabo apan dead on arrival nga gideklarar sa doctor.
Sa pagsulat ning balita gidala na sa Bollozos funeral parlor sa maong siyudad ang biktima samtang gi-coordinate na sa traffic investigator ang pamilya sa biktima aron pasuta kung asa nipaingon ang amahan niining ni-atras sa biktima.
Ang kaso padayon pang giimbestigahan sa kapolisan kung wala ba gituyo ang maong insidente ug aksidente lamang. (Stephanie V. Berganio)