DI BA dugay na ang ngan nga Metro Cebu?
Nagpasabot kini sa paspas nga nagmalambuong mga dakbayan ug kalungsoran nga nilangkob gikan sa Carcar sa habagatan ngadto sa Danao sa amihanan.
Dugay nang nakita ang panginahanglan nga dunay buhatan nga magtutok sa pagpahan-ay sa Metro Cebu, diin dunay komon nga giatubang nga problema sama sa trapiko, drainage system, zoning, kriminalidad ug uban pa.
Busa di epekto ang solusyon sa mga problema kon mag-iyahay ang matag lokal nga kagamhanan, kinahanglan og koordinasyon.
Niadtong sayong bahin sa 2000, si kanhi Kongresista Raul del Mar niduso og balaudnon nga magtukod sa Metro Cebu Development Authority (MCDA) apan gibabagan tungod sa “pulitika” busa wa molusot.
Nabanhaw karon ang pagtukod sa maong ahensya pinaagi sa gitawag og Metro Cebu Development Coordinating Board (MCDCB) pinaagi sa pagpangulo ni Gob. Gwen Garcia.
Ang bag-ong lakang, sama niadto, nakadawat usab og pagsupak o way igong pagsuporta labi na sa dakbayan sa Mandaue ug Lapu-Lapu human ang mga mayor wa motunga sa importanteng tigom.
Wa ba makita nila ni Mayor Jonas Cortes sa Mandaue ug Mayor Paz Radaza sa Lapu-Lapu nga silay mas makabenepisyo niini?
Sama sa unop sa miaging tuig sa ilang dakbayan, gawas way maayong drainage, ang tubig nitagos gikan sa laing dapit. Bahin sa kagubot sa trapiko (labi na tali sa siyudad sa Sugbo ug Mandaue)?
Tataw nga ang problema sa mga dapit sa Metro Cebu nagdugtong ug ang pagsulbad mas epektibo kon magkahiusa sa plano ug aksyon.
Maayong ihiklin ang subrang pamulitika pabor sa kalamboan sa Sugbo.