Sugilanon: Dugo Sa Kagabhion

Joel Lawes

Brgy. Bawo, Sogod, Cebu

ISOG ug puno sa determinasyon ang mando kaniya sa ilang labaw.

“Gisaway na ta pag-ayo sa media, Sandival! Wa ta kasulbad sa sagunson nga pagpanulis sa banko dinhi sa siyudad. Get the robbery group dead or alive, especially your brother, the leader!”

“Yes, Sir!” Misaludo si SPO4 Daniel Sandival sa ilang labaw. Nagpangagot ang iyang mga bag-ang. Nag-alintabo sa kasuko ang iyang kahiladman.

Pinabundak ang paglingkod ni Sandival sa sopa sa ilang balay sa iya nang pagpauli. Masuk-anon siya.

“Sobra na! Angay na silang puhagon!” Nag-pangyawyaw si Sandival.

“Sila ba si Alberto ang imong gipasabot, Daniel?” Miduol si Teresa kang Sandival. Nakasabot siya sa gibating kasuko sa iyang bana. Kini maoy gitahasan pagdakop sa mga tulisan sa banko sa siyudad.

“May lain pa!” Nataas ang tingog ni Sandival.

“Igsuon mo si Alberto, Daniel,” kalmado ang tingog ni Teresa.

“Way igsuon sa balaod, Teresa. Nakasala siya. Angayan lang siyang silutan! Angay siyang dakpon, patay man o buhi!”

“Unya, unsaon man lang ang gitugon sa namatay ninyong inaha?”

Wa makatubag si Sandival. Nanghupaw siya. Sagunson ang iyang pagpangagho. Igo lang siyang mitutok sa iyang asawa.

LAWOM na ang gabii. Mainampingon si Sandival ug ang iyang mga sakop nga nangamang paingon sa biniyaang balay sa usa ka hilit nga dapit sa siyudad. Kini ang balay nga giingon sa iyang tigpaniid nga maoy pundohanan sa mga tulisan.

Milanog ang tingog ni Sandival sa gikuptan niyang megaphone.

“Mga pulis kini! Ampo kamo nga malinawon! Wa na moy kaikyasan pa!”

Mga buto gikan sa tag-as nga armas sa mga tulisan ang tubag nga nadawat ni Sandival. Misugwak sa iyang dughan ang gibating kapungot.

“Men!” matod ni Sandival. “Open fireeeee!”

Misibaw ang mga buto sa kamatayon. Taudtaod gayud. Unya usa ka anino ang milighot gikan sa maong balay. Namatikdan kini ni Sandival. Hilom niyang gisundan ang anino.

Layo na sila sa balay. Nahunong na ang pinusilay. Dako ang pagtuo ni Sandival nga nahurot na pagkamatay ang mga tulisan sulod sa balay.

“Alberto!” singgit ni Sandival.

Mihunong pagdagan ang tawo nga gisundan ni Sandival. Si Alberto nga manghod ni Sandival.

“Ayaw na pag-ikyas, Alberto. Ampo sa balaod!” inggit ang mando ni Sandival.

“Di ka makahimo pagdakop nako, Manoy Daniel! Labaw na nga di ka makahimo sa pagpusil nako. Ayaw kalimot sa gitugon sa atong inahan,” nagngisi nga namulong si Alberto.

Nahinumdom si Sandival sa ilang inahan sa nagtinga na kini sa kamatayon human atakiha sa kasingkasing. Unang namatay ang ilang amahan. Duha ra silang magsuon.

“Ibilin ko ninyo ni Alberto ang pagdumala sa atong kalubian ug kamaisan, Daniel. Ayaw pasagdi si Alberto. Mahala siya.”

Gitando niya ang ilang inahan. Nag-eskuwela sila si Alberto sa Police Academy. Pero wa motiwas si Alberto kay nabuang sa mga dautang bisyo. Hangtod nahimo kining lider sa pagpanulis sa mga banko dinhi sa siyudad.

BANG! BANG! Milanog ang duha ka buto. Usa ka lawas mihagsa sa yuta. Wa nay kinabuhi.

“Pasayloa ko, Ma!” Mikibot ang mga ngabil ni Sandival. May mga luha nga nabiaw sa iyang mga mata. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph