DI gyud ibalik ni Cebu City Mayor Michael Rama ang allowance ug sustento sa dakbayan ngadto sa New Cebu City Jail sa barangay Kalunasan.

Si Rama, atol sa pagpakighinabi sa mga tigbalita, nagkanayon nga hangtod magpadayon ang pagpangiskapo sa mga piniriso sa kanhi Bagong Buhay Rehabilitation Center (BBRC) nga gitawag na karon og Cebu City Jail, padayong pagpalusot og shabu ug mga butang nga gidili sud sa bilanggoan, di gyud mabalik ang insentibo ug sustento nga dugay nang gipangita sa jail officials.

Sa miaging semana, ang buhatan sa mayor niduso og rekomendasyon sa pagpatangtang sa kasamtangang jail warden nga si Supt. Felixberto Jagorin Jr.

Ang suwat nadawat na sa Bureau of Jail Management and Penology (BJMP-7), apan ilang gi-refer ang suwat tungod kay ang ulohang buhatan lang ang makahukom sa hangyo ni Rama.

Si Rama nawagtangan na og pagsalig sa katakos ni Jagorin gumikan sa testimoniya niini sa sala sa usa ka huwes nga di siya makapasalig sa seguridad ni SP01 Adonis Dumpit sud sa bilanggoan sanglit daghan siya og napabalhog sa City Jail sa dihang gawasnon pa siya.

Nihangyo pa si Jagorin sa pagpabalhin kang Dumpit ngadto sa bilanggoan sa dakbayan sa Talisay sanglit luwas siya didto.

Si Jagorin nilanat pa lang og pito ka buwan sukad sa iyang pag-asumir sa City Jail apan kaduha na siya maeskapohi og piniriso.

Hinuon nasignit ra usab kini og balik sa kapulisan

Si Kong. Tomas Osmeña, dihang siya pa ang mayor, nitangtang sa ilang tag P1,000 nga allowance matag buwan ug P200,000 nga sustento sa siyudad alang sa pagpakaon sa mga piniriso gumikan sa mga kahiwian sa maong bilanggoan sama sa komisyon sa pagkaon, drugas ug special treatment sa ubang mga piniriso.

Bag-o pa lang sab nasakmitan og mga pinakete nga shabu ang usa ka inmate sa mao nga bilanggoan.

Si Rama wa sab makauyon sa kapakyas sa pagpahibawo ni Jagorin sa buhatan niya kalabot sa pagtambong sa husay sa korte kalabot sa seguridad ni Dumpit.

Si Dumpit gibalhin sa City Jail human mohangyo sa korte si Janette Badana, inahan ni Ronron Go, kinsa giingong gipatay sa pulis.

Si Badana nipasangil nga nakagawas gawas sa bilanggoan sa Criminal Investigation and Detection Group (CIDG-7) si Dumpit ug iyang nakit-an.

Gitugtan sab ni Judge Esther Veloso ang hangyo ni Badana.