POSITIBO ang nahimong resulta sa panaghinabi tali sa mga opisyal sa Maguindanao ug sa Moro Islamic Liberation Front nga gitumong alang sa kalinaw sa maong probinsiya.

Kini maoy gipahibawo ni Maguindanao Governor Esmael Mangudadatu sa dihang nahinabi sa Bombo Radyo.

Sumala ni Mangudadatu nga misaad ang liderato sa MILF nga dili na mohimo og kaguliyang sa Maguindanao human nahitabo ang pagpamanhig sa grupo ni Kumander Tautin Salindab kon diin pito ka mga paryente sa gobernador ang napatay ug upat ang naangol.

"Maganda po ang resulta ng ating pagpupulong sa MILF dahil temporarily nagkausap po 'yong magkabila at magsasagawa pa ng another round of talks doon sa Maguindanao Task Force Reconciliation and Unification Team na ating binuo," butyag ni Mangudadatu.

Gimugna sab sa lokal nga kagamhanan sa Maguindanao ug MILF ang Crisis Management Team nga maoy mosuta sa ugat sa kagubot ilabina ang pagdeklara og ceasefire.

Gitutukan ni Mangudadatu ang pagtabang sa mga sibilyan nga namakwet human nahitabo ang kaguliyang.

"Inalam po namin kung ilan po talagang residente ang lumikas sa kabilang barangay at 'yon pong sinasabing tensiyon ay hindi mawala sa mga sibilyan natin na mangamba dahil sa hidlwaan doon," dugang pa ni Mangudadatu.

Bisan pa sa gipakatap nga pwersa sa militar ug kapulisan sa Barangay Tenok, Mangudadatu, nagmagahi pa gihapon sa pagbalik ang 1,689 ka mga pamilya sa ilang mga pinuy-anan gumikan sa kahadlok nga duna pay moulbo nga kagubot gumikan kay anaa lang sa palibot ang mga nagkontra nga grupo. (EF)