USA ka pampublikong tunghaan ning siyudad ang nakapahimulos sa libreng computer equipment ug computer classroom nga gidonar sa Ang dating Daan sa paggiya ni Bro. Eliseo F. Soriano kagahapon.
Sigun ni Bro. Dino Hilario sa UNTV nga ang napili nilang tunghaan mao ang Vicente Hizon Elementary School, Pampanga ning siyudad.
Dugang ni Hilario nga ang pagpa-abot nila og ayuda sa maong tunghaan kabahin lamang sa ilang timong nga makahatag og serbisyo ngadto sa nanginahanglan, matabangan sab ang mga kabataan nga maka-angkon og dugang himan sa pagtungha nga ilang gikinahanglan.
"Sa Vicente Hizon, sila yung may computer room pero very ironic kasi wala silang computers. So ngayon na nabigyan natin, ang unang gagamit ay yung mga teachers. Sila mismo hindi masyado alam kun paano gamitin ang computer, kaya sila ay sasailalim sa summer tutorial for computer, para magamit nila, maituro din nila sa kanilang mga estudyante," ni Hilario atol sa Club 888 Forum.
Nasayran nga ang Vicente Hizon maoy unang beneficiary sa proyekto.
Sumala pa nga ang computer room nganlan og Bro. Eliseo F. Soriano Computer Room isip pahinungod ngadto sa una nga maoy presiding minister sa Members Church of God International nga nagsaulog sa ilang ika-47 katuig sa pagserbisyo sa katawhan ug Makagagahum.
Ang na-renovate nga computer rooms gisudlan sa 10 ka computer hard drive upgrades, keyboards, aircon.
Nag-unang katuyuan sab sa pagpaabot sa programa nga mahatagan og higayon ang mga kabataan nga matudlo kanila ang modernong teknolohiya nga maghatag kanila og impormasyon nga makatabang sa ilang pagtulun-an.
Dugang ni Hilario nga ang proyekto nahimong posible pinaagi sab sa ayuda sa Kabalikat sa Pamamahayag, empleyado sa UNTV, miyembro sa Church of God International.
Luyo niini ubay-ubay pa sab ka mga kalihukan sa komunidad ang gipaluyuhan sa grupo.
Sama na lamang sa clean-up drive nga gihimo nila sa Brgy. Gov. Vicente Duterte Agdao ug ang tree planting activity. (Rhona Goc-ong)