SUWERTE pa gihapong naluwas ang usa ka lalaki bisan pa sa daghang naangkon nga mga samad dinunggaban sa iyang lawas human daling nadala sa ospital niadtong Lunes sa gabii.

Ang biktima nga nadala sa Paulino Hospital didto sa dakbayan sa Digos mao si Johnrey Lobo, 21, ulitawo ug taga Lapu-lapu Extension sa nahisgutang lugar.

Subay sa niguwang taho gikan sa Davao del Sur Provincial Police Office (DDSPPO), nga samtang si Lobo tua sa Galors Store sa Lim Extension, duha ka mga suspek kinsa nailhan nga si alyas Ungas, molupyo sa maong dapit ug laing Tavanlar Taj, nagpuyo sa Balite Central sakop sa Barangay Zone 1 maoy miluba sa biktima.

Sumala pa nga nakig-istorya lang si Lobo sa iyang mga higala sa dihang giduol sa mga suspek ug way paglangan gidunggab gamit ang hunting knife.

Human sa pagluba, mga suspek daling misibat gikan sa nahitaboan.

Gihulagway sa mga pulis nga personal nga bikil ang hinungdan sa maong pagpangluba. (Dondon Dinoy)