Dili pa lamang dugay 3 ka kinabuhi ang nakalas, pinaagi sa pagbitay didto sa China, panaminan ta kini mga parekoy nga dili sa tanang panahun nga anaa sa maayong kahimtang ang mga higala tang mga OWFs didto sa laing nasud.
Mi-abot sila sa mapait nga gidangatan... ang wala damhang hinanaling kamatayon. Sumala pa, biktima sila sa mga yawan-ong tinguha sa mga illegal recruiters ang natagamtaman ngadto sa mga biktima.
Espoko Mo? Tungod sa mga damgo nga dali nga makakuha sa igong dakong salapi maoy hinungdan nga nahimo ang maong salaod. Busa, magbantay kita sa mga illegal recruiters nga maoy modala unya kanato sa dautang kapahamakan mga higala ug sano.
Usab, atong mga pahasubo sa mga nahibiling pamilya sa 3 ka mga biktima
***
Diha sa kapitolyo, padayon pa gihapon ang dula sa pulitika tali ni Gobernador Oscar Serina Moreno batok sa bag-ong mga sakop sa mayoriya nga sumala pa gipaluyuhan daw, sa kanhi Gobernador Dongkoy Emano.
Espoko Mo? Tungod sa bangi sa 2 ka mga protagonista, naunsyame o mahimong malangan o dili gayud mahinayon ang gikatakda nga usa ka proyekto sa pagbuhat sa dugang provincial hospital didto sa lungsod sa Alubijid nga mokabat ngadto sa 100 ka milyon ka pesos.
Sumala pa, paga-suportahan ang katunga sa mga galastuson sa Overseas Worker Welfare Administration (OWWA) ug ang laing katunga maggumikan gikan sa laing pondo sa Provincial Government alang sa mga galastuson sa pag-construct sa ika 6 unta nga provincial hospital sa Misamis Oriental ilalum sa administrasyon ni Governor Oca Moreno nga nag-apil na didto sa Magsaysay, Gingoog, Talisayan, Balingasag ug Initao.
Tungod sa kakulangon sa pondo, ang Provincial Government buot mohulam pinaagi sa loan sa Land Bank of the Philippines pag-otorisar unta ni Moreno pagkuha niini pinaagi sa balaodnon, wala kini tagai sa pagtagad sa present Provincial Council nga sumala pa dili mga ka-alyado sa gobernador.
***
PULSO - maayong balita sugdan na sa dili madugay ang pagrehabilitate o pagpaanyag sa dakong dalan nga nagpalibot sa plaza Divisoria pinaagi sa inisyatibo o proyekto ni Congressman Rufos B. Rodriguez. Tungod niini, mahimong mabalhin temporary o permananente ang dapit diin gigamit kini alang sa senemanang Nite Cafe ug ang pag-display-baligya sa mga Ukay-ukay matag gabii sa Biernes ug Sabado. Sumala pa, didto una kini ipahimutang sa Rodelsa Circle sa Macasandig o didto ba sa Golden Mile project likod sa City Hall o kilid sa suba sa Carmen mga parekoy.
***
Padayon ang programa ang DOH, sa ilang "Ligtas sa Tigdas ang Pinas," kini ang paghatag sa bakuna sa kabataan 'door-to-door' sa atong mga health workers batok sa sakit, sa nagpanuigon kutob sa 8 ka tuig paubos.
Dinhi sa CDO, gipahigayun ang paglusad niini niadtong Abril 4 ug matapos kini sa Mayo 4 pinaagi sa motorkada ug usa hamubong programa diha sa Divisoria Bandstand, tinambungan nila ni DOH Assistant Secretary Nemesio T. Gako, Assistant Regional Director Jose Llacuna, representante gikan sa WHO ug Dr. Jerrie Calingasan, City Health Officer. Wala na man kitay dugang kitay espasyo mga igan, sano ug parekoy. Hangtud sa sunod... maayong adlaw.