BISAN paman sa hugot nga programa ug seguridad sa Northern Mindanao Medical Center (NMMC) ning siyudad sa Cagayan de Oro nga mahimong usa ka smoke-free ang maong tambalanan pipila gihapon ang nakasupak niini.

Nasayran nga usa ka smoke-free hospital ang NMMC ning siyudad diin tanang mosulod sa maong tambalanan gibawalan nga manigarilyo sa sulod nga bahin.

Wala usab sila nagkulang sa pagbutang og mga poster kalabot sa mga resulta o mga makuhang sakit diha sa pagpanigarilyo.

Tanang mga bisita o mga pasyente gidili ang pagpanigarilyo sa bisan asa nga dapit nga duol sa NMMC.

Usa ka miyembro sa No Smoking Association Task Force sa NMMC nga nahinabi sa Sun.Star Superbalita niingon nga ilang gitukod ang task force aron magsilbing bantay sa mga tawo nga kusog kaayong manigarilyo ug pagbadlong kanila.

Gimugna ang anti-smoking task force sa maong tambalanan tungod kay nasutang makadaot kini og dako sa panglawas ug ang NMMC isip usa ka Training Center for Health sila nag-awhag sa katawhan labina sa mga smokers nga hunongon na gyod ang pagpanigarilyo.

Sila mohatag og suporta sa mga tawo nga gustong mobiya na sa pagpanigarilyo kini mahimo pinaagi sa pakig appointment sa clinic, ready access to nicotine lozenges sa mga smokers o mga bisita, magtabang pinaagi sa individual basis o makigkonsulta alang kanila.

Nasayran nga 100 metro ang kalay-on gikan sa ospital sa NMMC usa pa makapanigarilyo ang mga tawo apan namatikdan nga daghan gihapon ang misupak niini labina gyod sa gawas nga bahin sa NMMC ug dili mabantayan.

Hinuon wala na gyod mamatikdan nga mga nanigarilyo sulod sa balay tambalanan ug ilang gitinguha nga dili lamang sa maong balay tambalanan apan sugdan nga dili na himuon mismo sulod sa puloy-anan. (Stephanie V. Berganio)