WALA’Y ayong nakaduwa si Junmar Fajardo apan gipamatud-an sa Gaisano Capital-University of Cebu (UC) Webmasters nga kaya gihapon nilang mobarog ning maong sitwasyon pinaagi sa pagpukan sa Ave Maria-University of San Jose Recoletos (USJ-R) Jaguars, 72-68, sa miaging gabii sa Cesafi- 2011 Partner’s Cup sa Cebu Coliseum.

Sa halftime, igo lang naglabaw ang Jaguars og 35-33 apan unsa bang pagkaunsaa nga sa pagsulod ni Fajardo sa 3rd quarter, nabiyaan na man hinuon og samot ang Webmasters, 44-33.

Nagkagidlay gyud ang duwa ni Fajardo hilabi na kay hugot kaayo ang depensa sa Jaguars ngadto kaniya apan nakakita og bag-ong kasandigan ang Webmasters. Si Fajardo igo lang nakamugna og tulo ka puntos.

Sa pagpangulo nila ni Archie Batua, Gerald Ampoon, Edward Pao, ug Bryan Heruela, miaginod ang opensa sa Webmasters hangtod nga nakamugna sila og 63-54 nga labaw sa nahabiling 2:00 minutos.

Gikan niadto, wala na molingi pagbalik ang Webmasters hangtod nga nakuha nila ang solong liderato dala ang 2-0 nga baraha. Ang Jaguars natagak sa 1-1 nga rekord.

Sa laing duwa, gipangbuntog sa San Marino Corned Tuna-Southwestern University (SWU) Cobras ang Rose Aquarius Merchandising-University of Southern Philippines Foundation (USPF) Panthers pinaagi sa overtime, 65-62.

Ang Cobras aduna’y 1-1 nga baraha samtang ang Panthers adunay 0-1 nga rekord.

Puntos kada usa

1st game

San Marino-SWU (65) – Pacquiao 15, Nalos 10, Padilla 7, Armecin 6, Goloran 5, Pineda 5, Brigondo 4, Urot 4, Guillena 4, Pogoy 2, Wagas 2, Dalondonan 1

Rose Aquarius-USPF (62) – J. Ferraren 11, Dajalos 11, Cabahug 8, Sidurifa 6, E. Ferraren 6, Meca 5, Avila 5, Misa 3, Linao 2, Corcilles 2, Sollano 2, Genobia 2

2nd game

Gaisano Capital-UC (72)- Ampoon 12, Heruela 9, Caytona 9, Batua 9, Mohammad 7, Pogoy 5, Magallanes 5, Pao 5, Aranas 4, Fajardo 3, Labolabo 2, Delos Santos 2

Ave Maria-USJR (68)- Nudalo 16, Abing 8, Sanchez 7, Olbedado 7, Dela Rama 7, Capillar 5, Cinco 4, Tabaloc 4, Suliman 4, Lajato 2.