GIBALITA sa Sun.Star Superbalita kagahapon nga usa ka tawo gisentensyahan sa korte og 80 ka tuig nga pagkabilanggo human siya mapamatud-ing sad-an sa pagpatay ug pagtagodtagod sa duha ka mga babaye didto sa dakbayan sa Talisay kapin sa duha ka tuig na ang nakalabay.

Sa di pa nato tubagon ang pangutana sa atong ulohan, balikan nato paghisgot ang kalainan sa silot nga reclusion perpetua ug life sentence. Klaruhon nato nga managlahi kining duha.

Ang reclusion perpetua mao ang kinabug-atang silot nga gipahamtang sa mga krimen ubos sa Revised Penal Code ug sa ubang mga balaod kansang mga silot nagsubay sa mga silot nga gipahamtang sa Revised Penal Code. Sa laing bahin, ang life imprisonment kon pagkabilanggo sa tibuok kinabuhi gipahamtang sa mga special laws.

Ang reclusion perpetua dunay gidugayon nga 20 ka tuig ug usa ka adlaw hangtod sa 40 ka tuig, samtang ang life imprisonment way gitagal nga panahon. Buot ipasabot sa life imprisonment, mag-agad kini samtang buhi pa ang gibilanggo. Samtang buhi pa, magpabilin siya sa prisohan.

Balik tas pangutana kon magpariso ba ang usa ka tawo og 80 ka tuig?

Ubos sa Article 70, Revised Penal Code, bisan pa kon magsapaw-sapaw ang sentensya sa usa ka konbiktado, ang iyang silbihan sa prisohan di gyud molabaw sa 40 ka tuig.

Busa kon ang usa ka tawo nga nakonbikto sa duha ka kaso sa murder unya gisentensyahan og duha ka tag 40 anyos nga pagkabilanggo, di niya silbihan ang 80 ka tuig kon di ang kinatas-an ra nga mao ang 40 ka tuig.

Sa ato pa, kadtong tawo nga nakonbikto sa duha ka kaso sa murder unya gisentensyahan og duha ka tag 40 anyos, 40 anyos ra ang iyang pagkabilanggo, di 80 anyos.

Apan lahi kon nakonbikto siya sa usa ka special law kansang sentensya life imprisonment. Ubos niini, kon pananglit nakonbikto ang usa ka tawo sa dihang nagpangedaron siyag 20, posibleng mapriso siyag 80 ka tuig kon moabot siyag 100 ka tuig.

Kini tungod kay way tagal ang life imprisonment. Mag-agad lang asa kutob ang kinabuhi sa usa ka tawong konbiktado.

Sa ato pa, klarong di mapriso ang usa ka tawo og 80 ka tuig ubos sa reclusion perpetua sa revised Penal Code. Apan dunay posibilidad nga mapriso ang usa ka tawo og 80 ka tuig ubos sa life imprisonment nga gipahamtang sa mga special laws kon hatagan siya sa kahitas-an ug taas nga kinabuhi.

(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya gikan sa ala-una ngadto sa alas dos sa hapon sa sibyaan DYSS Superadyo sa RGMA network.)

(Sa mga reaksyon kang Atty. Eddie O. Barrita: e-mail: edbarrita@yahoo.com, Cell No. 09165805285 o sa Room 201, 18 Cherry Court Bldg., Gen. Maxilom Ave., Cebu City, 233-4542)