GIKALIPAY sa kadagkuan sa Task Force Ellah Joy ang report nga si Ian Charles Griffiths gidakop sa kapulisan South Hampton, England niadtong Sabado.
Hinuon gibuhian ra si Griffiths human makapiyansa.
Si Sr. Supt. Patrocinio Comendador, director sa kapulisan sa lalawigan sa Sugbo ug tigpamaba sa Task Force Ellah Joy, nagkanayon nga dako og ikatabang sa kaso ang pagkasikop ni Griffiths.
Siya niingon nga di na unya sila magkaproblima sa task force sa pagpangita sa langyaw kon magpadayon ang kaso sanglit ubos na man kini sa pag-monitor sa kapulisan sa United Kingdom (UK).
Gani wa siya masayod sa pagkasikop ug nahibaw-an nalang niya dihang gi-interview siya sa usa ka reporter sa local newspaper.
Matod pa niya nga posibling ang mga awtoridad sa London, England nagtuo nga si Griffiths nalambigit sa krimin kay may kalabutan man sab ang kaso sa human trafficking ug pornography gibantayan og maayo sa international community.
Hinuon duna silay gidusong report ngadto sa ilang ulohang buhatan sa Campo Crame.
Paningkamutan nila sa Task Force nga madala gyud si Griffiths dinhi sa nasod.
Hinuon iyang giangkon nga moagi pa kinig insaktong proseso sanglit lahi og balaod ang UK.