MOKABAT sa P5 milyones ang kantidad sa mga alahas, laptop, cell phones ug cash ang nakuha sa unom ka mga tawo nga ningtulis sa sakyanan sa M. Lhuiller kagahapon sa mga alas 2 sa hapon sa habig sa dakbayan sa Lapu-Lapu sa Marcelo Fernan Bridge.
Ang mga tulisan nga pulos armado og kalibre .45 migamit og martilyo aron ibuak sa windshield sa Toyota Innova nga gisakyan sa mga manager nga gikan sa Mindanao dala ang rematadong mga alahas.
Apan kapulisan wa mosalikway sa posibilidad nga inside job ang hitabo ug ang mga tulisan adunay contact gikan sa sulod, ilabi na didto pa sa Mindanao.
Kini maoy ikaduha nang higayon nga gitulis ang mga manager sa pawnshop nga gikan gihapon sa Mindanao. Ang una nahitabo niadtong 2005.
Ang Toyota Innova (plate no. YHZ-615) kolor gray ug tinted, gimaniho ni Mariolito Obenita ug iya sa M.Lhuiller, nisugat sa mga manager gikan sa Ozamis ug Cagayan De
Oro city, sakay sa usa ka abyon .
Ang sakay sa abyon nga niabot ala 1:20 gikan sa Cagayan De Oro giilang sila si Manuel Quiero Jr., pawnshop general manager; Antonio Bueno; ug Ceasar Lisondra Jr., area manager.
Samtang ala 1:40, niabot ang abyon gikan sa Ozamis sakay sila si Agustin Wagas, area manager; Grace Degracia, area manager; ug Abbis Ares, pawnshop branch manager.
Ang mga manager giingong paingon unta sa ilang main office sa may Reclamation Area sa dakbayan sa Sugbo alang usab sa usa ka meeting nga ipahigayon
Apan paghiabot sa may tiilan sa Marcelo Fernan Bridge sa dalan sa Manuel L. Quezon Brgy. Pusok, matod ni Obenita, nga kalit lang usa ka itom nga Starex van nga kusog ang dagan ni-overtake.
Napugos siya sa pagpadaplin ug nihinay sa pagpadagan.
Diha iyang nakita ang tulo ka mga motorsiklo nga sakay ang tag-duha ka mga tawo bitbit ang kalibre.45 nga pistola ug dayong hapak sa bildong bintana ginamit ang martilyo.
Si Senior Supt. Anthony Obenza, direktor sa Lapu-Lapu City Police Office (LLCPO), nibutyag nga ang usa sa mga manager nga sakay sa front seat maoy nakuhaan sa iyang bag nga adunay sulod nga mga alahas nga mokantidad og P5 milyones.
Gawas sa mga alahas, lakip sa nakuha ang mao ang laptop, cash nga P10,000 ug cellphone.
“Kon nakuha pa ang tanan gamay ra nang P5 million. One third ra kuno na ingon ang general manager nga akong naestorya,” asoy ni Obenza nga nahinabi sa Sun.Star Superbalita.
Human sa hitabo, daling ningsibat ang mga tulisan paingon sa dakbayan sa Sugbo samtang ang mga biktima gidala sa police station.
Gipanguha ang ilang tanang mga cell phone sanglit giklaro ni Obenza nga ang tanang mga sakay sa sakyanan ubos karon sa ilang imbestigasyon.
Pasado alas 4 sa hapon, ang kapulisan sa Lapu-Lapu adunay nadawat nga report nga usa ka motorsiklo gibiyaan sa atubangan nga bahin sa usa ka mall.
Gituohang mao kini ang gisakyan sa mga tulisan.
Gani ila nang nakuha ang jacket ug helmet.
Ang kapulisan sa dakbayan sa Lapu-Lapu nakig-alayon na sa tanang unit sa mga pulis apil na niini ang kapulisan sa dakbayan sa Sugbo ug lalawigan sa Sugbo.
Kahinumdoman niadtong 2005 gitulis usab ang sakyanan sa kompaniya sa mga tulsian nga sakay sa van nga nag-unipormi pag mga Swat.
Nakuha gihapon ang mga alahas nga mokantidad gihapon og P5 milyones.