APROBADO na sa Konseho sa lungsod sa Sta. Cruz, Davao del Sur ang katukoran sa coal fired power plant sa Aboitiz Power Corporation didto sa Barangay Inawayan nga adunay 21 ka ektarya, samtang ang 30 ektarya ania masakop sa Barangay Binugao, Distrito sa Toril nga sakop ning atong siyudad sa Davao.

Sa atong nahibaw-an, unanimous ang boto sa mga myembro sa Konseho sa Sta. Cruz sa maong proyekto ug gani sa atong paghinabi kang Mayor Joel Lopez sa maong lungsod, gisuportahan nila ang proyekto tungod kay gikinahanglan gyud kini sa umaabot nga panahon agi'g pagpangandam nga dili kita kapos sa kuryente ilabi na sa Sta. Cruz nga gidagsa sa mga industrial nga negusyo.

Dinhi sa mga myembro sa Konseho sa Davao, maaprobahan kaha sama sa gihimo sa Konseho didto sa Sta. Cruz? May balita kong nahipos nga niini kunong bulan sa Abril ilang botohan, apan wa pa sad ta masayod kon ila bang aprobahan o ibasura.

Kay ila pa man daw pa-imbestigahan sa Ombudsman kadtong midawat og "pabaon" nga kantidad lang og P6,000.

Sus, Ginoo ko! Kon mao ning klaseha sa atong mga magbabalaod, kanunay tang iwit sa mga maayong proyekto nga una, para unta nato. Nahinumdom ko sa San Miguel Corporation niadtong dekada 80 nga dinhi unta sa atong siyudad tukoron, pero tungod kay tagaon man dayon sa mga konsehal niadtong tungora, milayas didto sa Sta. Cruz ug karon sila ang nabulahan.

Karon nakaangkon kuno'g pagdayeg si Konsehal Emmanuel Galicia kay mitug-an nga nakadawat siya'g P6 mil gikan sa Aboitiz Power Corporation. Pero, nganong si Galicia ra man ang gidayeg? Si Konsehal Nonong Cabling nakadawat man pod ug uban pa, nganong wa man malakip sa pagdayeg? Angay diay'ng dayegon kon motug-an nga ningdawat sila'g kuwarta gikan sa maong kompaniya?

Para sa Aboitiz, sa sunod kon manghatag mo'g kuwarta sa atong mga konsehal, way laktaw hutda ang tanang mga konsehal kay ang wala makadawat nangita ra ba kon asa daw ang ilang P6 mil. Sa akong nahibaw-an ang maong kantidad pang-gastos sa mga konsehal nga gidapit sa kompaniya didto sa Misamis Oriental para sa usa ka misyon nga obserbahan ang coal fired power plant didto, ug dili daw kadto suborno.

Sa Sta. Cruz, wala man nila hatagi'g malisya ang nadawat nilang panggastos nga P5,000, dinhi sa ato sensitibo ra kaayo ta kay sa pagtuo sa mga Dabawenyo gipamalit na mo sa Aboitiz sa maong kantidad.

Ang pangutana karon, ang coal fired power plant go na ba kay aprobado naman sa konseho didto sa Sta. Cruz? Aw, sa ila tapus nang problema. Hinumdomi nga ang 30 ektarya nia sa atong siyudad nasakop ug ang bola karon anaa sa atong mga buotang konsehal. Magkano gyud mga sir, ah, este kanus-a gyud maaprobahan diay mga sir?

Paminawa ang "KONTRA BALANSE" sa dxKT, 1071 sa dial sa inyong mga radyo, alas 6 hangtud alas 8 sa buntag, Lunes hangtud Sabado. Ug alang sa inyong dugang sugyot ug komentaryo pag-email lang sa algenoguin@yahoo.com