PADAYONG gisupak sa mga lumad didto sa lungsod sa Kiblawan, Davao del Sur ang tinguhang pagmina Sagittarius Mining Corporation (SMI).
Nihimo karon og protesta ang Tribal Council of Kiblawan ilawom sa pamuno ni Gideon Salutan aron babagan ang pagmina sa SMI sanglit alang nila makadaut kini sa kinaiyahan ug sa ilang kaumahan.
Nihimo og pagbantay ang kapulisan sa lugar palibot sa SMI aron masegurong luwas ang kompaniya ugaling sakyan sa ubang grupo.
Hinuon, malinawong gihimo sa mga lumad ang ilang protesta dungan sa ilang singgit nga undangon ang operasyon sa SMI.
Gawas sa mga lumad, dugay rang nialma ang grupong Tingog ug Gugma alang sa kinaiyahan kay di sila gustong maguba ang kalasangan sa nahisgutang lugar.
Nabalaka ang mga nagpakabanang sektor nga apil maapektuhan ang panginabuhian ilabi na ang mga mananagat ugaling masagol ang mga kemikal sa tubig gikan sa planta.
Sa milabay'ng semana, gi-presenta na sa SMI ang ilang mga programa sa
Sangguniang Panlalawigan (SP) ilabi pa nga hapit nang sugdan ang ilang coal fired power plant sa lungsod sa Malalag, Davao del Sur.
Hinuon, gipasalig sa SMI nga di maapektuhan ang katubigan ilabi na ang irigasyon padung sa mga basakan.
Sa pagkakaron, gihugtan og maayo ang pagbantay sa kapulisan sa SMI gumikan kay daghang mga grupo ang misupak sa pagmina ilabi na gyud kay ang dapit haduol sa lugar nga daghang naglihok nga mga bandido. (Orlando Dinoy)