GILUSAD na karon ang paglutos sa kapulisan didto sa lungsod sa Laak Comval Province batok sa mga rebeldeng sakop sa New People's Army nga mi-ambus sa mga sakop sa Laak Municipal Station niadtong Martes sa hapon.
Sumala pa ni Police Senior Superintendent Aaron Aquino, provincial director sa Comval Province Police Provincial Office, nga ang kapulisan ug kasundaluhan nagtambayayong aron sa pag-gukod sa mga rebelde nga responsable sa pag-ambus nga gikamatay sa usa ka drug suspect nga nadakpan unta sa kapulisan niadtong tungura.
Sumala pa nga pasado alas 2:00 sa hapon, usa ka buy-bust operation ang gihimo sa mga sakop sa Laak MPS didto sa Barangay Aguinaldo sa nahisgutang lungsod.
Pag-uli sa kapulisan dala ang ilang dinakpang suspetsadong drug pusher nga si Warlito Bastillada, gi-ambus sila sa wa matinong gidaghanon sa mga sakop sa NPA didto sa Barangay Bollukan, lungsod sa Laak.
Nakahimo pa sa pagsukol ang mga otoridad hinungdan nga miatras ang mga rebelled padulong sa bukirong bahin sa maong lugar.
Apan way suwerteng naigo ang dinakpan nga si Bastillada sa ulo ug daling gidala sa Davao Regional Hospital sa siyudad sa Tagum.
Apan wa siya kalahutay ug gideklarang dead on arrival sa mga doctor tungod sa grabeng samad nga nahiaguman.
Hinuon, way gikatahong nasamdan sa tropa sa gobyerno atol sa hitabo. (Marvin Pineda)