DUHA ka cluster group sa tribung Badjao dinhi sa siyudad ang nakapahimulos sa programang Pantawid Pamilya Pilipino Program (4Ps) sa Department of Social Welfare and Development (DSWD).

Gibutyag ni Merlinda Paragamac, regional program coordinator sa 4Ps, nga usa sa ilang gitutukan karon sa makadawat og ayuda gikan sa gobyerno mao ang mga Badjao nga aminadong wala gyuy tinong panginabuhian alang sa ilang pamilya.

Giangkon ni Paragamac nga ispesyal nga pagtagad ang ilang ginahatag ngadto sa pamilyang Badjao nga nakapahimulos sa proyekto, tungod sab sa ilang kultura ug pagsabot sa programa.

"Sa Badjao community nato, special gyud ang pagtutok sa ilaha sa coordinator, tungod sab gud sa ilang culture and literacy level. Mao nga naghimo gyud og special module alang nila diin ginapasabot gyud sila unsa ang programa, nganong gihatag kini sa gobyerno, unsa ang ilang buhaton. Magsugod gyud sa uno ang pagpasabot kanila, para sab sila on their behalf, maningkamot nga maka-comply sila sa program," pasabot ni Paragamac.

Apan dugang sa opisyal nga bisan og ispesyal ang pagtutok nga ginahatag ngadto sa Badjao community, sama gihapon ang ilang madawat nga kantidad.

"Same amount pa rin ang ilang madawat, walay special treatment para nila. Ginatutukan lang gyud sila gina-check ang ilang compliance."

Nauna ng misaad ang nasyunal nga gobyerno nga mas daghang pobreng pamilya ang makapahimulos sa programa, diin karon nga tuig target nila ang 2.3 milyones ka pamilya sa nasud nga matabangan, mahatagan og suporta subay sa 4Ps.

Nauna na sab nga giyagyag ni Paragamc nga sa siyudad sa Davao sa kasamtangan dunay 13,993 ka potential beneficiaries.

Pagpasabot ni Paragamac nga ang "potential beneficiaries" nagpasabot nga kini mao sila ang kasamtangang ginatutukan sa mga evaluators sa DSWD, ginalantaw ang ilang kapasidad, sila ba gyud makonsidera nga "deserving" nga makadawat og financial assistance gikan sa gobyerno.

Dugang pa nga sa pagkakaron, 59 ka barangay na dinhi sa dakbayan ang napailawom sa programa.

Sa pikas bahin, bag-uhay ra sab nga gihimo ang community assemblies, registration ug validation schedules aron ma-accomodate ang dugang beneficiaries nga makapahimulos sa ipatuman nga Set 4 sa 4Ps.

Ang Set 4-A gilangkuban sa Baganga, Davao Oriental; Kapalong ug New Corella, Davao del Norte; ug Maragusan ug New Bataan, Compostela Valley.

Ang Set 4-C gilangkuban sab sa munisipalidad sa San Isidro, Governor Generoso ug Boston sa Davao Oriental; Island Garden City of Samal (IGaCoS) ug Asuncion sa Davao del Norte; Montevista ug Pantukan sa Compostela Valley; ug Sulop sa Davao del Sur.

Ang Pantawid Pamilya usa ka Conditional Cash Transfer (CCT) program. Usa kini ka poverty-reduction strategy sa nasyunal nga kagamhanan nga gipatuman sa DSWD.

Nagahatag kini og cash subsidy ngadto sa pinaka-pobre nga pamilya aron mapalambo ang ilang panglawas, nutrisyon ug edukasyon sa ilang mga anak nga nag-edad og 0-14 anyos.

Gikinahanglan lamang nga ang pamilya nga napailawom sa programa mosubay sa kondisyones nga gipangayo aron padayon sila nga makapahimulos sa kaayuhan nga dala sa 4Ps ngadto kanila. (Rhona Goc-ong)