HILABIHAN ang kaguol nga gibati sa usa ka amahan kinsa gikawatan sa usa ka commercial sex worker kagahapon sa kaadlawon sanglit wa na siyay ikapalit og tambal sa iyang anak nga naospital sa Southern Philippines Medical Center (SPMC).

Si Pepito (tinuod nga pagkatawo gitago sa SuperBalita) mihilak sa tumang kalagot human siya gibiktima ni Girlie (tinuod nga bansagon gitago) sud sa usa ka lodging house sa kanto mga dalang San Pedro ug Legaspi, siyudad sa Davao.

Si Pepito midangop sa San Pedro Police Station aron ireklamo ang babaye nga mikawat sa iyang pitaka nga dunay sud nga singko mil pesos.

Ang biktima nagsulti nga naglakaw lamang siya alas 3:00 sa kaadlawon didto sa dalang San Pedro diin niya nahimamat ang usa ka giingon nga bugaw nga nagpaila sa pangalan nga Rose.

Si Rose mihanyag sa biktima nga lipayon siya ibabaw sa kama uban ang ma nyag nga babaye ug dihang nakita sa biktima ang gitudlo nga babaye, nagkasabot sila nga mosud sa lodging house.

Human natuman ang katuyuan sa biktima, daling mikanaog ang babaye apan dihang gihiling sa biktima ang iyang bulsa nahanaw na ang iyang pitaka.

Tungod sa nahitabo, gikompronta sa biktima si Rose aron patug-anon kung asa ang iyang partner apan way ikatug-an ang nahauna mao nga mireklamo siya sa kapulisan. (Alger Dura)