HUMAN sa pipila ka adlaw nga miguwa ang sugyot nga padaganon na ang mga public utility buses dinhi sa siyudad sa Davao, giklaro nga di na kini mahitabo, sigun sa direktor sa Land Transportation Franchising and Regulatory Board (LTFRB) sa Davao.

"So far, ingon sa mga consultants dili pa karon ang panahon nga pwedeng padaganon ang mga buses dinhi sa Davao City. Ingon, nila, di pa haum dinhi sa siyudad ang mga buses proven by the Asian Development Bank study," ni LTFRB Director Benjamin Go kagahapon dihang nahinabi sa SuperBalita human sa gihimong konsultasyon sa mga lider sa transportasyon didto sa Apung Kula Restaurant.

Si Go nagkanayon nga ang iyang nahaunang pahayag nagkanayon nga estudyohan una kung puwede ba nga padaganon ang mga bus dinhi sa siyudad, apan ilang nasuta karon nga dili kini puwedeng himuon sa siyudad.

"Ito ay study pa lamang, kaya sinabi ko na open tayo sa pagkakataon na patakbuhin ang mga buses. Hindi lang natin isara," pahayag ni Go.

Ang maong opisyal usa sa mga dinapit nga bisita sa gihimong konsultasyon nga gihimo sa Sustainable Urban Transport.

Kauban sa maong opisyal mao ang mga lider sa Transmission-Piston Southern Mindanao, Southeastern Diverified Drivers and Operators Cooperative, Network of Transport Organization, ug ubang transport groups.

Mga lider sa sektor sa transportasyon unang misupak sa sugyot nga mga bus na ang padaganon dinhi sa siyudad. Si Edil Gonzaga, secretary general sa Transmission-Piston, nagbutyag sa SuperBalita nga misupak sila sa maong sugyot sanglit daghan ang apektadong drayber kung mahitabo nga mga bus na ang modagan sa nag-unang rota sa dakbayan.

"Di man mi supak sa kalambuan sa dagan sa transportasyon, apan dili pa karon ang panahon nga himuon kini sa gobyerno," ni Gonzaga.

Gawas sa sektor sa transportasyon, unang misupak niini nga proposal mao si Mayor Sara Duterte sanglit alang kaniya di pa karon ang hustong panahon nga aprobahan ang lakang sa direktor sa LTFRB.

"Di pa siya timely ug gikinahanglan pa dinhi ang makuting pag-study kung mayo ba nga pabiyaheon dinhi sa city ang mga buses," ni Duterte dihang nahinabi sa SuperBalita.

Gipasabot sa mayor nga kinahanglan nga estudyohan og maayo sa gobyerno ang maong lakang aron way maagrabiyado nga mga sektor sa katilingban.

Si Bise Mayor Rodrigo Duterte supak sab sa sugyot sa LTFRB sanglit daghang mga tawo ang mawad-an og panginabuhi.

"You will displace a lot of people. Dako ra kaayo na, duha ka bus magbabag sa lane wala na. Maligsan ang daghang drivers. We have narrow streets. I do not agree with the assessment na mas mahapsay ang dalan. But we can establish some sort of satellite, but not sa downtown area. LTFRB should reconfigure their dimensions in that area," ni Duterte sa iyang programa nga Gikan sa Masa Para sa Masa. (Alger Dura)