WA DAMHA sa usa ka backhoe operator nga ang iyang gimaneho nga backhoe maoy hinungdan sa iyang kamatayon human siya naipit alas 3:30 sa kaadlawon niadtong Miyerkules.

Ang insidente nahitabo samtang nagkargada ang biktima didto sa Purok 31, Barangay Inayangan, distrito sa Calinan, siyudad sa Davao.

Ang biktima mao si Roland Marcha, 32, minyo, nagpuyo sa Purok 9, Barangay Liling, Hagonoy, Davao del Sur.

Si Marcha gikataho nga nag-operate sa Nippon Backhoe nga maoy nagkargada sa usa ka Fuso truck nga dunay plate number RJK 213, base sa spot report sa Calinan Police Station.

Giingon nga samtang nagmaniobra ang biktima sa maong backhoe, kalit lang naligas ang maong ekipo hinungdan sa pagkahulog pangpang.

Si Marcha, kinsa wa nakabantay sa kalit kaayo nga panghitabo, naipit sa backhoe, hinungdan sa iyang hinanaling kamatayon.

Tungod sa kabug-at sa backhoe, dugay naugkat ang biktima sa mga mirespondeng kapulisan.

Ang patay nga lawas sa biktima atua karon gihaya sa Angel Funeral Homes Calinan Branch.