UNOM ka teams ang ningkompirmar sa ilang partisipasyon sa Cebu Basketball Association (CBA) Junior Under-18 basketball tournament nga sugdan karong Abril 24 sa Cebu Coliseum.
Ang mga mosalmot sa labing unang junior commercial tournament sa Sugbo mao ang Aces, Cebu Eastern College (CEC) Dragons, Ave Maria Sanctuary Park, Sacred Heart School Jesuits, Mandaue ug Azuki.
Ang utok sa pagkatukod sa torneyo nga si multi-titled coach Raul “Yayoy” Alcoseba nagkanayon nga nakahunahuna siya sa pagpasiugda sa kompetisyon aron mahashasan na’g maayo ang abilidad sa Sugbuanong mga basketbolista sa batan-on pa lang nga edad.
Gipasabot ni Alcoseba nga napapas na ang panahon nga ang kahadlukan gyud ang Sugbuanong mga basketbolista sa tibuok nasod dili sama kaniadto.
Usa sa mga rason nga nakita ni Alcoseba mao ang kaminos sa mga torneyo nga masalmutan sa mga basketbolista ning panahuna.
“Dili man gud pareha sa una nga bisa’g asa moduwa ang atong batan-ong players, daghang mang tournaments. Maong inig abot sa Manila, kuyaw gyud ang Cebuano players, dili na mahadlok,” matod ni Alcoseba.
“Karon gud ang Cesafi na man lang ang ilang maduwaan.”
Gipasabot ni Alcoseba nga bisan ang mga wala nagtungha puwedeng makaapil sa CBA Junior basta kuwalipikado lang ang edad niini.
Ang kampiyon sa torneyo makadawat og P100,000 nga balor sa sports equipments, P30,000 ang balor sa 2nd placer unya P20,000 ang balor sa 3rd placer.
Ang torneyo mosubay sa double-round robin elimination round unya ang mopatigbabaw nga upat mao ang makaabante sa sunod round. ESL