SUBLING gipasalig ni Donnie “Ahas” Nietes (27-1-3, 15 KOs) sa Ala Gym nga iya gyud nga ma-knockout ang Mexicanong si Armando Vasquez (18-5, 4 KOs).

Atol sa ilang katapusang press conference didto sa Palmas Del Mar Resort Hotel sa Bacolod, si Nietes mipabuhagay sa iyang kapreparado sa ilang away nga giulohan og ”Pinoy Pride 5” sa De La Salle University gym sa Bacolod City ugmang adlawa.

Gawas niini, iyang gipadayag ang iyang kahinam ug kalipay nga nakaaway og balik sa iyang yutang natawhan.

Si Nietes kinsa nakadepensa og kaupat sa iyang WBO minimumweight title didto sa Mexico, ang misaka karon sa iyang timbang ug nanglantaw sa iyang ikaduhang division title.

Tinguha niyang maaway ang modaog tali nila ni Jesus Geles ug Ramon Garcia Hirales karong Abril 30 alang sa world title fight.

Apan ang panganti ni Nietes daw sa igo rang giyam-iran ni Vasquez kinsa hanas taodtaod usab nga nagbasehan sa Amerika.

“He can talk all he wants,” nagkanayon si Vasquez. “I know that this is not my hometown.

But I feel like it is. I feel good.

Everyone in Mexico knows him. I prepared well for this bout.”

Mitambong sa presscon si ALA Promotions Pres. Michael Aldeguer ug ang GAB chairman nga si Ramon Guanzon. Ang official weigh-in ipahigayon karong adlawa. JBM