KON si Crisologo Saavedra, ang nagpatuo-tuo nga whistleblower, maoy pasultihon, si Gov. Gwen Garcia mao ang hinungdan sa balatian nga gihambin karon ni Vice Governor Greg Sanchez.
Sa ato pa si Gwen maoy kalbaryo ni Greg. Makakatawa man pod ta ning maong pamahayag ni Saavedra.
Mora man siya og iro nga nagpataka nalang og pamaghot.
Sa ato pa, si Gwen diay maoy nagdala og sakit diha sa Kapitolyo.
Kadtong nagkasakit si kanhi mayor ug karon Kongresista Tomas Osmeña, si Gwen gihapon ang basulon.
Kuyaw diay ni kontrahan si Gwen kay magkasakit man ang mokontra.
Kay matod pa ni Saavedra nga gumikan sa pagpanggukod ni Gwen kang Greg, mao nay hinungdan nga migrabe ang balatian sa bise gobernador.
Ang wala pagpirma sa appointment ni Saavedra, ang wala pag-renew sa kontrata sa ubang ang wala pag-approve sa gahin alang sa newsletter sa office of the vice governor ug uban.
Sa ato pa, og sa Tagalog pa, “dinidibdib” diay na sa bise gobernador.
GIHATAG SA GINOO
Dili uy, kanang sakit gihatag na sa Ginuo kanato.
Dili nato sagulan og pulitika ang kahimtang sa panglawas sa usa ka pulitiko.
Beterano na si Greg sa pulitika ug naanad na siya sa mga kontrobersiya.
Imposible nga maapektuhan ang iyang panglawas sa pagpanggukod ni Gwen.
Siguro miabot na gyod sa punto nga medyo seryoso na ang iyang gihambin nga balati-an.
Kitang tanan mo-agi man ana ba labi pa og magkatiguwang na ta.
Layo ra na sa tinai sa manok nang imong pagtumbok ni Gwen, Mr. Saavedra.
Kuyaw ni og ma-slide si Saavedra diha sa Kapitolyo unya mahagbong sa hagdan.
Si Gwen siguro gihapon ang iyang basulon.
Ang angay himuon aning Saavedra maayo pa nga utingkayon niya ang ubang mga anomaliya diha sa Kapitolyo kay sa magsige og pamasangil sa walay pulos nga isyo.
O dili ba iyang i-pressure ang Ombudsman nga dalion pagresulbar kanang mga kaso ni Gwen diha sa maong buhatan sama sa Balili Property ug Cebu International Convention Center (CICC).
PANAHON NI MARCOS
Nagduda ko nga kanang mga kaso ni Gwen gipangyak-an na sa taga Ombudsman.
Kay kana si Apostol nabutang na diha sa puwesto gumikan sa endorsement sa mga Garcia.
Kanunay god na siyang motambong sa kalihukan diha sa Kapitolyo bisan sa mga private affairs ni Gwen.
Matapos na lang ang termino ni Gwen, dili pa na maresulbar sa Ombudsman ang iyang mga kaso.
Nahinumdom man ko sa panahon ni Pres. Marcos nga kon adunay mahitabo sa taga oposisyon si Marcos dayon ang basulon.
Kon adunay pamatyon o mahanaw nga taga oposisyon, si Marcos dayon ang basulon.
Dihay usa ka oposisyon dinhi sa Sugbo nga nahagbong sa manhole diha sa tunga sa kalsada.
Gibasol gihapon si Marcos kay wala matabuni ang maong manhole. Mao na ang pasangil ni Saavedra ngadto ni Gwen.