2 ka motor gikarnap gipangita sa DavSur

DUHA ka mga motorsiklo nga gikarnap sa managlahing lugar sa Davao Region ang gipangita sa kapulisan didto sa probinsiya sa Davao del Sur.

Ang unang motorsiklo nga gikarnap mao ang Honda TMX 155, kolor pula ug

gipanag-iyahan ni Arnel Tajor, nagpuyo sa Purok 1, Barangay Tagnocon, lungsod sa Nabunturan, Compostela Valley Province.

Subay sa alarma gipadangat sa Davao del Sur Provincial Police Office (DDSPPO) kagahapon, gikanayon nga banda alas 2 sa kaadlawon niadtong Abril 6, nawala ang maong motorsiklo samtang giparada gawas sa balay sa biktima.

Samtang ang ikaduhang motor nga gikarnap nahitabo didto sa Distrito sa Toril sa siyudad sa Davao.

Usa ka Honda XRM, nagbaton og plaka YD 718, kolor blue ang gikarnap ug gipanag-iyahan sa usa ka Wilfredo Mantawil, lumolupyo sa Dona Saturnina Street, Toril, siyudad sa Davao.

Sumala pa sa kapulisan nga nagpatabang si Mantawil human nga pugsanong gikuha kaniya ang motor sa wala mailhing mga suspek nga armado og mahait nga hinagiban samtang didto siya sa Mulig, Toril.

Gituohan sa otoridad nga didto gidala sa probinsiya sa Davao del Sur ang mga gikarnap nga duha ka motor hinungdan nga gipangita na karon sa kapulisan.

Giawhag sab sa kapulisan ang mga drayber nga di magpataka og biya sa ilang mga motorsiklo aron nga di makarnap.

Apil nga gipahimangnoan sa otoridad mao ang mga drayber sa habal-habal nga mamasada ilabi na sa kagabhion aron nga di mabiktima sa mga karnaper. (Dondon Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph