DUHA ang naangol dihang aksidenteng mibuto ang armas sa usa ka pulis nga giintrigo sa gwardiya sa Southern Philippines Medical Center (SPMC) niadtong Huwebes.

Nasamdan mao sila Carolyn Guro, 31, nagpuyo sa Barangay Malamba, distrito sa Marilog ug Rubilyn Fernandez, 21, nagpuyo sa Doña Salud, Barangay Sasa, siyudad sa Davao.

Si Guro nakaangkon og samad sa iyang tuong tiil samtang si Fernandez nakaangkon og samad sa iyang walang tiil dihang mibuto ang armas nga gipanag-iyahan ni Police Officer 3 Renante Medina, sakop sa Davao City Police Office (DCPO).

Base sa blotter sa Buhangin Police Station, mibuto ang .45 kalibre nga pistol ni Medina nga gitunol ngadto kang Joel Cometa Liba, 43, minyo, security guard, nagpuyo sa Regina Compound, Bajada, ning siyudad.

Si Medina giingon nga dunay gisusi sa maong tambalanan mao nga iyang gideposito ang iyang armas, apan gimandoan si Liba sa iyang head guard nga si Jerry Bugas nga susihon kung wa na bay bala.

Sa pagsusi sa maong gwardiya, aksidenteng mibuto ang armas hinungdan nga naigo ang mga biktima nga dunay pasyente sa maong tambalanan.

Mga biktima dali sab dayong giatiman sa mga doktor sa SPMC samtang si Liba uban ang mibuto nga armas, gidala sa Buhangin Police Station. (Alger Dura)