USA ka bata ang nilanding sa balay tambalanan human na-sideswiped sa taxi niadtong Huwebes mga alas 3:00 sa hapon sa Ramon Cahvez-Aguinaldo St. ning siyudad sa Cagayan de Oro.
Giila ang biktima nga mao si Mao-Mao Martalla, 4, sa susamang dapit kinsa nagdula-dula pa niadtong tungora daplin sa kalsada.
Dihang ni-backing ang taxi nga nagdala sa KVU-206 paingon sa usa ka hotel kalit lang nga na-sideswiped si Martalla nga miresulta sa pagkabawog sa tiil niini ug pagkapanit sa lapa-lapa.
Gidala ang biktima sa Northern Mindanao Medical Center (NMMC) kinsa padayon pa nga giobserbahan sa mga doctor ning panahona.
Samtang laing lalaki ang gitouhang nabanggaan sa sakyanan ang nakitang nagbuy-od sa dalan sa Barra, lungsod sa Opol, Misamis Oriental.
Nailhan pinaagi sa iyang identification card ang biktima nga mao si Helbert Vicente Sangilan, 22, taga Purok-4, Sambulawan, lungsod sa Laguindingan, Misamis Oriental.
Nagkadugo na lamang nga nakitang nagbuy-od ang biktima sa usa ka nagpakabanang katawhan kahagapon mga alas 3:00 sa kadlawon sa maong dapit.
Gitabangan ug gidala sa Northern Mindanao Medical Center (NMMC) ning siyudad ang biktima kinsa giapanawagan ang pamilya niini nga bisitahon ang biktima.
Dili tiaw ang naangkon niining bun-og sa lawas ning panahona.
Ang kaso gisunod na sa Opol Police Station. (Stephanie V. Berganio)