NADALA sa balay tambalanan ang usa ka lalaki human giluba sa gituohang tulisan kagahapon mga alas 12:00 sa kadlawon sa Bulua, ning siyudad sa Cagayan de Oro.

Giila ang biktima nga mao si Marlou Abragan, 42, minyo, taga Zone-2. Bulua ning siyudad.

Gisaysay sa biktima nga anaa siya natulog niadtong tungora sa ilang tindahan labina kay nauso man ang mga pagpanglungkab sa mga tindahan sa dapit.

Apan nakamata ang biktima tungod kay kalit lang siya nga giluba sa wala maila nga suspetsado gamit ang kutsilyo.

Maayo na lamang nakasinggit ang biktima ug nakapangayo og tabang sa iyang mga silingan hinungdan dali usab nga nagresponde ang mga silingan apan ang suspek dali na nga misibat ug nakadagan.

Nalubaan ang bukton sa biktima ug usa sa tiyan nga bahin niini nga daling gidala sa mga silingan sa Northern Mindanao Medical Center (NMMC) ug gibutyag sa biktima nga pagpangawat og tulis ang motibo sa suspetsado tungod kay kanhi na nga gisuwayan og lungkab ang maong tindahan hinungdan usab nga gibantayan na niini ang sulod.

Ang kaso giatiman na ning panahona sa kapolisan sa Police Station 7 sa Bulua ug gipangita na nag suspek nga gituoahng resident era sa dapit.

Sa pagsulat ning balita, ang biktima kasamtangan pang giatiman sa mga doctor sulod sa emergency room ug giobsebahan ang kahimtang. (Stephanie V. Berganio)