ADUNAY penalty nga P5,000 samtang mahimong kanselahon ang prankisa sa usa ka establismento kung dili gihapon makabutang sa Closed Circuit Television (CCTV) o surveillance camera ning siyudad sa Cagayan de Oro ning panahona.

Si Acting City Mayor Ramon Tabor nagpadangat nga natapos na ang lugway sa mga establismento diha sa pagbutang og CCTV apan pipila gihapon ang wala nakamuntar niini.

Gimandoan na niini ang bag-ong Cagayan de Oro City Police Director Polioce Senior Superintendent Gerardo Rosales nga magsugod na sa pag-monitor ug pagsusi sa mga establismento kung nituman na ba kini sa iyang gipalabang nga ordinansa.

Gipasabot sa maong opisyal nga unta sa pagkakaron motuman na kining pipila ka mga establismento tungod kay alang man kini sa ilang kaayuhan ug pagtabang sa kapolisan sa dali nga pagsulbad panahon nga dunay mahitabong krimen.

Gipasabot ni Tabor nga niadtong tuig 2008, iyang gipalabang ang ordinansa kalabot niining kinahanglan na nga magnuntar og mga CCTV ang tanang establismento sa siyudad labina ang mga pawnshop, tindahan, gasoline station, ug eskwelahan ug kini giaprobahan sa iyang kauban sa konseho.

Tungod niini, gihatagan og kopya sa maong ordinansa ang tanang mga establismento ning siyudad apan ang mga establismento nihangyo ug nangayo og lugway nga usa ka tuig kapin aron makamuntar apan ning panahona nilapas na sa gihatag nga lugway ang maong mga establismento.

"Nilapas na sila sa among gihatag nga lugway ug angayan na gyod nga magbutang sila tungod kay nakabutang sa ordinansa nga maximum nga penalty sa dili makabutang niini ang kantidad nga P5,000 ug mahimong tangtangan pa sa prankisa," ni Tabor sa usa ka interbyu sa Radyo.

Gani iyang gideyeg ang usa ka gasoline station sa Camaman-an nga nagmuntar niini tungod kay makita man kung unsa ka epektibo sa CCTV pagtabang og sulbad sa krimen ug wala na naabtan sa pila ka adlaw ug nailhan dayon ang mga tulisan tungod niini.

Gihangyo ni Tabor nga magmuntar na kining mga pawnshop apil ang mga swkelahan labina nagkaylap kining kidnapping nga kaso, pagpanulis sa mga pawnshop ug pagpangawat sa mga tindahan.

"Kung naa man gud ang CCTV mahadlok ang mga balahibuon og kamot, mga adunay dautan og huna-huna sa pagpangawat ug pagpanulis," ni Tabor. (Stephanie V. Berganio)