DAGHAN karon ang nagnegusyo og pagkaon sa bisan asang dapit, gagmay man o dagko nga mga establisimento, tungod kay ang tawo mokaon man gyud ug dako ang posibilidad nga mo-klik gyud kini.

Apan ato lang aghaton kining nanag-iya og mga kan-anan, restaurant o bisan unsang matang sa negusyo nga naglambigit og mga pagkaon paghatag usab og kahinlo sa ilang mga gibaligya.

Maayo natong kaon unya diay ang naghimo sa atong gikaon walay insaktong seminar diha sa kalimpiyo sa ilang gisirbi nga pagkaon. Responsibilidad baya sab ninyo ang inyong mga kustomer.

Kini akong nahisgutan tungod sa akong nakita niadtong niaging adlaw nga usa ka insidenti diha sa usa ka establisimento sa Cogon area. Usa ka establisimento nga namaligya og lechon manok, liempo, pork barbecue ug uban pang mga sud-an. Dili lang sa nako nganlan ang maong establisimento.

Daghan sab og suki kining maong establisimento, gani pipila na usab ka higayon nga nakakaon ako sa maong dapit. Apan luyo sa kasayuran nga dili diay maayo ang ilang pag-andam sa atong gikaon.

Nakalabay man gud ko sa maong dapit usa ka buntag niadtong niaging adlaw ug mao gyud akong nakita ang mga tinuhog nga manok ug karneng baboy nga gibutang sa salog nga semento nga walay hapin. Take note... sa dapit nga agianan sa mga tawo nga paingon mosulod sa ilang kan-anan. Dihang gipang-alsa kini sa mga boy nagpilit pa ang panit sa karne diha sa semento. Gani nakatanga pa ang usa ka empliyado dihang nakakita sa ako nga nihunong ug nagtan-aw kanila.

Siguro mao gyud kini ang sagad nila nga buhaton sa ilang mga baligya.

Bisan kinsa ang pasultion, dili gyud maayo ug angay gani nga kanselahon ang ilang permit niini sa pagpamaligya tungod kay dili kini makaayo ngadto sa ilang mga kustomer.

Atong panawagan sa mga hingtungdan nga ahensiya sa pagsusi niini kay basin kamo nakakaon na usab sa maong establisimento ug kong gusto kamo mosusi niini tawag lang sa among buhatan sa Sun.Star Superbalita sa telepono 856-8549.