MANAGSUON na karon ang lalawigan sa Sugbo ug ang probinsya sa Ilocos Norte.
Ang kasabutan alang sa “sisterhood” sa duha ka mga lalawigan gipirmahan nila ni Cebu Gov. Gwen Garcia ug Ilocos Norte Gov. Imee Marcos kagahapon sa buntag sa Kapitolyo.
Nisaksi sa seremonyas ang mga miyembro sa Hunta Probinsyal sa Sugbo, mga mayor ug bise mayor sa lalawigan ug mga department heads sa Kapitolyo.
Gipaabot nga magbinayloay og daghang mga proyekto ang Cebu ug Ilocos Norte human mapirmahan ang sisterhood agreement.
Si Marcos niingon nga daghan og makat-onan ang Sugbo sa ilang probinsya labi na sa teknolohiya sa windmill ug ubang klase sa renewable energy nga makita usab sa Ilocos Norte.
Iyang gidugang nga daghan usab sila og makat-onan sa Sugbo labi na ang pagpalambo sa ilang turismo diin daghang makit-an nga mga “heritage structures” o mga karaang balay ug ubang estruktura nga nagbarog panahon pa sa Espanya.
“There is so much to learn from Cebu”, matod pa ni Marcos dihang nahinabi sa mga tigbalita kagahapon human pirmahi ang memorandum of understanding.
Si Garcia niingon nga bukas ang lalawigan nga maggamit og renewable energy labi na kay nagkataas ang demand sa supply sa kuryente sa Sugbo tungod sa malambuon nga ekonomiya.