MAKADAWAT og tabang pinansiyal gikan sa Kapitolyo ang mga testigo sa tulo ka mga krimen nga ubos sa witness protection program sa kagamhanan sa lalawigan sa Sugbo.
Personal nga gitunol ni Gob. Gwen Garcia ang upat ka mga tseke alang sa upat ka mga testigo sa WPP ngadto kang Chief Supt. Ager Ontog, director sa Police Regional Office-7 sud sa buhatan niini kagahapon sa hapon.
Uban sa heneral pagdawat sa tseke si Sr. Supt. Patrocenio Comendador, acting director sa Cebu Provincial Police Office ug ubang opisyal sa kapulisan.
Ang matag tseke nagkantidad og P9,000 nga gidawat ni Atty. Rose Arnado sa Provincial Legal Office nga maoy nagpresentar sa WPP ubos sa Anti-Criminality Task Force sa lalawigan.
Matod ni Arnado nga mas sayon ang pag-apply sa WPP sa Kapitolyo itandi sa Department of Justice aron ma-enganyo ang ubang mga testigo sa krimen nga mopatim-aw usab ug motabang sa mga otoridad pagsulbad sa krimen.
Ang madawat nga mga tseke sa mga testigo pasiuna pa lamang tungod kay gipasalig sa abogado nga hangtud ubos pa sila sa WPP sa Kapitolyo, padayon sila makadawat og tabang pinansiyal sa lalawigan.
Si Ontog niingon nga gawas sa financial assistance, hatagan usab og police security ang mga testigo sa WPP ingon man temporaryong kapuy-an samtang magpadayon pa ang kaso niini.
Wa hinuon gidetalye sa opisyal kon unsa nga mga krimen ang gitestigohan sa upat ka mga witnesses apan suma pa niya nga mga “sensational crimes” kini nga naglambigit og murder, attempted murder ug kidnapping.
Gi-awhag ni Ontog ang ubang mga tawo nga nakasaksi og krimen nga mopatim-aw usab sama sa gibuhat sa ubang mga testigo tungod kay maglisod ang kapulisan pagsulbad og krimen kon way abag sa komunidad.