DILI sulbad sa kahuot sa trapiko sa Carbon ang pagpalapad sa dalan sa MC Briones basi sa lakang ni Mayor Michael Rama. Labing maayo nga ang kagamhanan sa siyudad sa Sugbo magtukod og tulo ka edipisyo aron mahibalik ang klaro nga Unit I, II ug III diha sa Carbon Market. Ang mga vendor adto na maninda sa stalls ug wala nay tugotan nga makabaligya sa kadaplinan. Unya ipatuman ang Market Code aron sayon sa mga konsumidor ang pagtultol unsay ilang paliton. Sa Unit I maoy ibaligya ang karne ug isda, Unit II maoy ibaligya ang utanon, lamas ug lagutmon samtang sa Unit III maoy ibaligya ang mga prutas ug ukay-ukay kay mao may uso karon. Busa niining paagiha Mayor Rama matuman ang imong giingon nga ang gubot hapsayon, ang huot paluagon, ang hugaw limpyuhon ug ang baho pahumoton.
GARBAGE TRUCKS
Dili ni pagkwestyon sa katakos ni Mayor Rama kon dili sugyot lang ni sa yanong lungsoranon kabahin sa koleksyon sa basura. Ang maayo tingaling buhaton sa siyudad nga mopalit og mga modernong compactor trucks aron iapod-apod sa mga barangay. Ato man god nga masaksihan nga ang mga garbage truck sa kabarangayan magulang lag dyotay sa balsahan. Bitaw pulos na gyod kagang-kagang. Inig hatod sa dumping site sa Inayawan mangahagbong sa karsada hilabihang baho-a kay lagi wala may basurang humot.
BASURAHAN UG TAMBAL
Kinahanglan mogahin usab ang siyudad para sementadong butanganan ug basura sa matag barangay aron dili magpasad. Ilain ang malata ug dili malata. Segurado nga makagahin niini ang kagamhanan sama sa pagtukod og edipisyo sa Carbon Market, compactor trucks ug sementadong basurahan kay migasto man gani og P5.4M niadtong Charter Day para sa premyo sa mga outstanding department heads ug sa buhong nga pagkaon. Ayaw pod kalimti Mayor Rama ang tambal alang sa CCMC kay basin mosibaw ang tyabaw sa mga kabos inig abot sa panahon nga hangtod ultimong gapas sila nay papaliton.
MIKE vs. TOMMY SA 2013?
Sa una pa gyod nga walay maayong serbisyo ang CCMC. Pero dili lang nato ipahid sa miaging pamunuan kay malooy ta ni Mayor Rama kay dili man sayon nga maglitaniya siya og 150 apologies, he he. Pagka-sayo baya sa tilimad-on nga si Kongresista Tomas Osmeña modagan og balik sa pagka-mayor kontra ni Mike Rama sa 2013. csa_1156@yahoo.com; 0905-250-4643.