GITUN-AN sa Task Force Ellah Joy ang dugang kasong ipasaka batok nila ni Bella Ruby Santos, ingon man sa uyab niining si Ian Charles Griffiths, kinsa gi-monitor na karon sa mga awtoridad sa United Kingdom.
Si Sr. Supt. Patricinio Comendador, director sa kapulisan sa lalawigan sa Sugbo ug tigpamaba Task Force Ellah Joy, nagkanayon nga upat ka mga kaso ang ilang gitun-an karon nga idugang batok nila ni Santos ug Griffiths.
Sumala pa niya nga tun-an nila ang pagpasakag kasong trafficking in person, ingon man kalapasan niini sa pornographic law.
Labi na niadtong mga ebidensyang ilang nakuha sama sa USB ug uban pa nga makapamatuod nga dunay mga kalihukan sama sa pornogapiya ang mga suspek.
Subay niini, ilang paningkamutan nga ang Pajero nga LMJ-382 di gyud makuhag balik sa depensa human sila nidusog mosyon sa korte dihang nimando ang korte nga ipauli kini kang Santos.
Matod pa niya nga ang Pajero kabahin sa ilang mga ebidensyang nahuptan kay maoy nakit-an sa ilang mga testigos nga gisakyan sa mga suspek nga ningdagit kang Ellah Joy.
Mala-umon siya nga paburan sa korte ang ilang mosyon kay makatabang kini sa pagpalig-on sa kaso.