NAKAPLAGAN na lang nga patay na ang usa ka lalaki kinsa naghikog didto sa Purok 3, Barangay Magdum, siyudad sa Tagum, Biyernes sa buntag.

Nailhan ang biktima nga mao si Armando Gura Jr., 22, molupyo sa nahisgutang dapit.

Sa report gikan sa Tagum City Police Station nasuta nga pasado alas 7 sa buntag, napalgan ang biktima nga wa nay kinabuhi nga nagbitay sulod mismo sa iyang panimalay.

Ang biktima naghikot og nylon sa iyang liog dayon bitay sa iyang kaugalingon sa kisame.

Napalgan sab duol sa patay'ng lawas sa biktima ang usa ka suicide note ug cellphone nga gituohang iya sa biktima.

Hinuon dili pa masuta unsa ang nagtukmod sa biktima aron kutluon ang iyang kinabuhi.

Gisusi pa sab karon sa kapulisan sa siyudad sa Tagum kung dunay foul play sa kamatayon sa biktima. (Marvin Pineda)