SUBLING mipaklaro ang usa ka opisyal sa Department of Social Welfare and Development (DSWD) sa mga reklamo nga may pabor-pabor ang pagpanghatag og ayuda sa gobyerno kalabot Pantawid Pamilyang Pilipino Program (4Ps).
Pahayag ni Merlinda Paragamac, Regional Program Coordinator sa 4Ps nga usa sa ilang ginapaniguro nga ang makadawat sa tabang pinansiyal subay sa programa mao kadtong lehitimo gyud nga makonsiderang “indigent” kun naglisod ang kahimtang sa kinabuhi.
Mao kini ang pagpaklaro sa opisyal human gipakisayran sa Superbalita labot sa pipila ka reklamo nga may mga evaluators sumala pa ang DSWD nga personahe sa barangay.
Ang mga evaluators maoy molantaw sa kahimtang sa potential beneficiary, sutaon kun sila ba deserving nga mapailawom sa programa.
Ni Paragamac nga ang gi-hire nila nga evaluators gituyo gyud sa pagkuha sa DSWD, apan may higayon nga ginapangayo sab nila ang tabang sa mga volunteer sa barangay.
"Ang atong mga evaluators gituyo na sila sa pagkuha sa DSWD para ana nga programa. Gi-hire sila for a certain time aron mag-evaluate sa atong potential beneficiaries, if ever man nga kuwang ta sa manpower ginapangayo nato ang tabang sa mga volunteers sa barangay nga atong adtuan, apan wala ni nagpasabot nga may gipaboran na," isplikar ni Paragamac.
Dugang pa niya nga human ma-evaluate ang usa ka banay subli na sab kini nga i-tsek sa ilang ahensiya aron kinatibuk-ang masiguro kun ang napili nga pamilya angayan nga mapailawom sa programa.
"Siniguro talaga natin nga kadtong modawat sa assistance is deserving gyud."
Nanawagan ang opisyal ngadto sa kinsa man nga may reklamo kalabot pamilya nga nakadawat sa tabang apan di unta angay nga ipaabot kini ngadto sa ilang buhatan.
"Kun may mga queries, complains sila we are open naman. I-inform lang mi nila aron sab atua nga mahatagan og aksiyon," sumala sa regional program coordinator sa 4Ps.
Nasayran nga di kini ang unang higayon nga gihamok og intriga, reklamo ang maong programa.
Mao nga gimugna ang Pantawid Pamilya Grievance Redress System (GRS) tumong nga matutukan, maresolba ang mga suliran nga gipadangat.
"It is intended to provide a venue for beneficiaries and the public at large to air their concerns, complaints and suggestions to improve the program. Their queries and complaints will be responded appropriately. The GRS also serves as a guide, for implementers and partners who are directly involved in the implementation of Pantawid Pamilya, on how to handle and resolve grievances that inevitably emerges," pagpasabot nila kalabot GRS.
Subay sab sa website nga www.fo11.dswd.gov.ph, mamahimo sab nga mopadangat og reklamo labot 4Ps pinaagi sa text.
I-text ang 4Ps (space) pangalan (slash) lugar (slash) reklamo ug i-send sa 0918-912-2813 o 4Ps Juan Cruz/Quezon City/Wala ako sa payroll dayon i-send sa gihatag nga numero.
Luyo niini giklaro sab ni Paragamac ang pipila ka pangutana kun nganong dunay mga lugar nga bisan og dunay pobreng pamilya wala mahilakip sa programa.
"Ang ginakuha nato is ang kadaghanan, so kinsa kadtong area nga may biggest percentage sa pobre mao na ang ginasudlan sa programa."
Sa kasamtangan ang Davao City may 13,993 ka potential beneficiaries, diin 59 na sab ka barangay dinhi sa dakbayan ang napailawom sa
programa.
Dugang kasayuran nga ang Tibungco, Bunawan, Marilog district ang may ubay-ubay ka pamilya nga napailawom sa 4Ps. (Rhona Goc-ong)