Mga duwa karon
4:00 p.m. – Air 21 batok Alaska
6:30 p.m. – Rain or Shine batok Ginebra
rMOSUWAY pagsulod sa semi-finals ang Brgy. Ginebra Gin Kings ug Alaska Aces sa ilang pagpakigbatok og balik sa ilang tagsatagsa ka kontra karong adlawa sa Game 2 sa quarter-finals best-of-three sa 36th Philippine Basketball Association (PBA) Commissioner’s Cup sa Cuneta Astrodome.
Ang Aces makigharong sa Air 21 Express sa premirong duwa nga sugdan sa alas 4:00 sa hapon samtang mosunod ang engkuwentro sa Gin Kings ug Rain or Shine Elasto Painters.
Kon modaog ang Aces, hayan ilang ikaharong sa semi-finals best-of-five series ang Talk N’ Text Tropang Texters samtang kon modaog ang Gin Kings, ilang ikasangka ang Smart RP Gilas sa laing semis showdown.
`Ang Aces nisalig na sab kang L.A. Tenorio sa hinapos nga bahin aron lupigon ang Express, 91-89, sa Game 1.
Sa himatyong segundos, wala’y kulba nga milusot ang maidlas nga pointguard apan nasipyat siya sa pagpasulod sa bola.
Niadtong aktuha, nakapuwesto og sakto si Sonny Thoss, kinsa maoy nakamugna sa nakapadaog nga follow-up shot alang sa Aces sa nahabiling 0.4 segundos.
Kanunay gyud untang nag-una ang Express ning maong duwa apan kalit lang nagbangis si Tenorio aron pangulohan ang paggukod sa Aces.
Ang three-point shot ni Tenorio, kinsa nakapupo og 19 puntos, maoy nagtabla sa duwa, 89-89, sa nahabiling 36.3 segundos.
Sa laing parisan, nagkumboya og 62 puntos sila si Ronald Tubid, Mark Caguioa ug import Nate Brumfield aron pangulohan ang 95-90 nga kadaugan sa Gin Kings batok sa Elasto Painters sa Game 1. (Frank Calapre)