ANG mga kabanay sa usa ka tawo nga gipatay sa lungsod sa Argao mga tulo ka tuig na ang nakalabay, midangop ngari kanako aron magpatabang sa pagpalihok sa kapulisan sa maong lungsod aron pagdakop sa ilang kanhi kaubang policewoman nga wanted na karon gumikan sa kasong pagpatay.

Ang mga kabanay sa biktima, Alejandro Caminade, mireklamo ngari kanako nga ang maong policewoman nga si Bella Albaracin, usa sa mga akusado sa pagpatay ni Caminade anaa ra magtago-tago sa maong lungsod. Apan wala gyod kini dakpa sa mga pulis bisan kon nalutsan na kini og warrant of arrest nga gi-issue ni Regional Trial Court (RTC) Branch 26 Presiding Judge Maximo Perez nga nagbase sa maong lungsod. Ang pending warrant batok ni Albaracin gikompirmar usab kini sa usa ka pulis sa Argao nga akong nahinabi kagahapon atol sa akong tulumanon sa DYSS Super Radyo Cebu.

LAKBIT-SAYSAY

Ania gamay background ning maong kaso. Nahitabo kini niadtong September 2007 sa Himongbongan, Taloot, Argao. Si Caminade gipakuha sa iyang mga amigo aron magduwa og tong-its sa balay sa iyang paryente duol usab sa panimalay ni Albaracin. Samtang nagduwa, kalit lang gipusil si Caminade sa usa ka tawo nga nailhan lamang nga Aldok.

Human sa hitabo, daghan ang nanggawas nga estorya nga naglambigit kang Albaracin ug sa iyang bana sa maong insidente. Gani adunay mga estorya nga adunay laing pulis usab sa nahitaboan, certain Jimmy, apan wala moresponde. Gitumbok nga si Albaracin, ang iyang bana ug usa ka Sammy nga maoy mastermind sa pagpatay kang Caminade. Ang nagpusil wala gyod mailhi nga gibutang na lang nga John Doe.

SAD-AN?

Matod sa mga haniti sa balaod, ‘flight is a sign of guilt’. Ang paglikay sa balaod, usa ka timailhan nga sad-an ang maong  tawo sa salaod nga diin siya gikiha.

Usa ka alagad sa balaod si Albaracin ug kon wala siyay sala, nganong nagtago-tago man siya? Nganong dili man niya atubangon ang maong kaso kon nagtuo siya nga inosente siya?

Matod pa sa mga kabanay nga naa ra si Albaracin diha sa Argao, apan nganong dili man madakop sa kapulisan? Kay ilang ‘kabaru’ kaniadto. Gamay ra anang Argao ug dali ra matultulan sa mga tinugyanan sa balaod kon tinud-on gyud pagpangita ug pagsiksik.

Unsaon man pag-angkon og hustisya sa mga biktima kon ang atong mga awtoridad magtinapulan o dili molihok? Ug mas labi pa kon adunay giprotiktahan. Hagit kini sa atong kapulisan sa Argao.

(bobby@sunstar.com.ph)