Serna: Bukid ug patag

NAABOT na lang kog lainlaing lugar sa Pilipinas ug naabot nako ang duha ka mga tumoy sa Cebu, apan wa pa gyud nako masaka ang ubang mga bukid sa Cebu City. Busa dihang giimbetar ko nilang James Lumasag ug Alinton Adolfo, akong mga kauban sa Sun.Star, nga manaka mi sa mga bukid sa Manipis sa Talisay dayon motapon sa mga bukid sa Cebu City, nitangdo dayon ko.

Tungas

Nag-abot mi sa Mc Donald sa Mambaling mga alas 6:30 sa buntag dayon niadto sa Tabunok aron hapiton namo sila si James ug Andos. Gikan didto, misikad mi padung sa taytayan sa Jaclupan. Niabot mig 13 ka mga biker.

Gikan sa taytayan, pulos tungason ang among giagian. Nag-una si Molmol sa pag-abot sa among unang destinasyon, ang nagsanga nga dalan padung sa Toledo City ug Sudlon 1.

Human mi namahaw sa usa ka tindahan, nanulhog mi padung sa Sudlon 1. Inay manulhog mi sa Brgy. Bonbon, didto mi nangagi sa Cantipla aron molapos sa Ayala Heights. Mga alas 2 sa hapon, niabot mi sa Buak, sa Brgy. Malobog. Igo ra kong nipahuway og mga 20 minutos samtang gahuwat sa uban. Dihang natapok na ang tanan, niuna kog lakaw kay Dominggo man.

Didto nako nakita ang kadaghan sa maanindot nga mga talan-awon nga mugna sa Ginuo.

Midako

Nakugang mi ni Jay Garganera sa kadaghan sa nanguyog sa among night ride niadtong Biyernes. Sa official nga lista, 151 sa akoang nahinumdoman. But daghan sab ang wa magpalista. Nagpaabot ming modako pa gyud nig maayo.

Mao nga nakahukom si Jay nga mopatawag og meeting sa amoang mga higala sunod semana aron maandaman og maayo ang night ride sa ingon luwas ang mga biker.

Bisan layo ang amoang biyahe nga 22 kilometros latas sa Cebu City, Mandaue ug Lapu-Lapu agi sa Marcelo Fernan bridge, apan lingaw kaayo ang tanan.

Karong Biyernes, hayan sa south Cebu City ang rota.

Pamilya

Tuod man, dunay mga magtiayon nga nanguyog. Sa ikaduhang higayon, mikuyog sila si Paolo Garcia ug iyang asawa nga si Michelle ug ilang anak nga si Jules. Dala sab sa magtiayong Dads ug Sharon Servande ang ilang mga anak nga sila si Shara Angela ug Shyra Andrea.

Ang center of attraction mao ang mga anak ni Jigger Cañedo nga sila si Lance ug Sean nga sa akong bana-bana wa pa ganiy nag 8-anyos sa magsuon. Diha ra sa ilang van ang asawa ni Jigger nagsakay.

Nagsige nag apil sila si Rudjard ug iyang asawa nga si Ivy. Naa sab ang mga taga Veco pinangulohan ni Armil Logarta. Ang grupo sab sa mga motorcyclist nila ni Roxanne Ornopia sa unang higayon misalmot. Naa sab ang USPF Piko-Piko Tribe nila ni Fred Cañete ug Charlene Pabonita.

Sa Biyernes, kita-kits.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph