KANHI lider sa usa ka gang nga nitambong sa usa ka peace talk nga gipasiugdahan sa ilang grupo ug sa karibal nga gang gipusil sa mga batan-on nga gituohang mga sakop sa ilang karibal nga grupo pasado alas 2 kagahapon sa kadlawon sa sityo Kamansi, Barangay Quiot, dakbayan sa Sugbo.

Ang biktimang samdan sa nagkadaiyang parti sa iyang lawas ug anaa sa kritikal nga kondisyon giilang mao si John Wayne Aventurado, 19, taga J. Tabora, Pardo sakop sa Bloods gang.

Ang mga gunman mao ang tulo ka mga batan-on nga lalake nga gidudahan nga mga sakop sa Crips gang.

Sa pasiuna nga imbestigasyon nga gihimo ni SPO4 Alex Dacua ug mga kauban sa Homicide Section sa Cebu City Police Office (CCPO) nagbutyag nga nag-inom ang biktima uban sa iyang uyab ug mga higala sa nahisgutan nga dapit.

Sila gikan nga ningtambong sa usa ka tigum tali sa laing gang alang sa usa ka peace talk human magkabangi ang duha ka mga gang.

Human sa peace talk, nanglakaw ang biktima uban sa iyang mga higala ug ninghapit sa usa ka imnanan aron mag-inom.

Usa ka motorsiklo ang niabot sa dapit nga gisakyan og tulo ka mga tawo.

Ang backrider maoy nikanaug, niibot sa iyang dala nga armas gipusil dayon ang biktima, kinsa wa makalihok tungod sa kakalit sa hitabo.

Wa hilabti sa gunman ang kauban sa biktima nga nag-iyahay pagpanagan palayo sa maong lugar dihang gipusil na si Aventurado.

Human mahagba ang biktima, ang gunman nibalik sa pagsakay sa motorsiklo ug nisibat palayo sa lugar.

Dunay nakaila sa hitsura sa mga killer nga gitumbok nga mga sakop ra usab sa Crips nga gika- peace talk pa sa biktima sa wa pa ang hitabo.

Nabalaka ang kapulisan nga posibling may mahitabo na usab nga kagubot sa dapit kay posibleng mobawos sab ang Bloods sa Crips.

Ang higpit nga panagribal sa duha ka mga gang dinhi sa Sugbo nikalas na og mga kinabuhi.

Daghan sa mga barangay ang naproblema sa duha ka mga gang, nga giisip nga hulga sa seguridad sa ubang mga dapit.